له بریاني پلورونکي عبدالمجید سره په یوه کوچنۍ هټۍ کې درې نور کسان هم کار کوي، خو په هېواد کې د انټرنېټ بندېدو دغه کوچنی کاروبار هم بې اغېزو نه دی پرې اېښي.
پخوا به یې له بریاني دوه ډک دېګونه وو او په انلاین ډول به یې پېرېدونکو ته بریاني رسول، خو اوس یې انلاین پېرېدونکي نه شته؛ ځکه چې په هېواد کې ټیلفوني خدمات او انټرنېټ بند شول او له پېرودونکو سره اړیکې نه نیول کېدې.
عبدالمجید وايي، ډېری پېرودونکو یې ورسره انلاین اړیکې نیولې، خو اوس رابطه نه لري چې له امله یې کاروبار زیانمن شوی.
بریاني پلورونکی عبدالمجید وړاندې وايي: « هو، په بشپړه توګه یې منفي اغېز پرې اېښی. زما کاروبار اکثریت انلاین او د ټیلفون له لارې دی او له مختلفو مارکېټونو، کورونو او دفترونو انلاین فرمایش را کوي. کله چې انټرنېټ بند شو، د هره ورځ درېیو دېګونو فروش څخه اوس یوه دېګ ته رسېدلی.»
د دې رسټورانټ چې عمده برخه یې بریاني پخول او پلورل دي، هغه کارکوونکي یې چې انلاین پېردونکو ته خدمات رسوي، له تېرو دوو ورځو راهیسې وزګار دي.
د دې کاروبار مالک اندېښمن دی چې که د انټرنېټ او ټیلفوني خدمتونو بندېدل تکرار شي، نو کارو بار به یې نور هم زیانمن او یوشمیر کارکوونکي به یې دندې له لاسه ورکړي.
بریاني پلورونکی عبدالمجید وايي: « که د انټرنېټ بندېدل ادامه ولري، زما د کار په ګډون به د ډېرو کاروبار سقوط وکړي. زه درې تنه کارګران لرم چې انلاین فرمایشونه رسوي، خو نن درې واړه بېکاره راته ناست دي.»
دا یوازې د عبدالمجید د بریاني پلورنې وړکی کاروبار نه دی چې د انټرنېټ او ټیلفوني خدماتو د بندېدو له امله اغېزمن شوي بلکې د هېواد په کچه ستر کاروبارونه او ان الکټرونیکي حکومتولي هم ترې جوړ نه دي پاتې.
