د انټرنېټ او مخابراتي خدمتونو د پرې کېدو له امله پر خصوصي سکټور سربېره عامه سکټور هم زيانمن کړی.
د احصایي او معلوماتو ملي ادارې او پاسپورټ ریاست مخې ته راټول مراجعین وایي، له تېرو درېیو ورځو راهیسې یادو ادارو ته ورتلل، خو کارونه يې نه ترسره کېدل. دوی له حکومت غواړي، انټرنېټ او مخابراتي خدمتونه باید فعال وساتل شي.
د الکترونکي تذکرو غوښتونکی عبدالقدوس وايي:« له وړمې ورځې راهیسې دلته راتلونکو مراجعانو ته بېرته ځواب ورکول کېږي، ځکه چې انټرنېټ بند دی. دلته د دې بندیز له امله د ډېرو کسانو کارونه پاتې دي، خو دا کارونه باید ژر ترژره خلاص شي؛ ځکه خلک ستونزې لري او لرې ځایونو راغلي دي.»
د پاسپورټ غوښتونکی زیارمل وايي: « دا خلک د پاسپورټ اخستلو لپاره له لرې پرتو ولایتونو څخه راغلي او دلته په اطاقونو کې پراته دي، دوی حتا د کرایې ورکولو وس نه لري. دا ستونزه باید حل شي، ترڅو خلک له دې ډول ستونزو سره مخ نه شي.»
همدارنګه، عام خلک هم نیوکه کوي چې حکومت بايد د انټرنېټ او مخابراتو له پرې کولو وړاندې عامو خلکو ته خبر ورکړی وای، ترڅو له یې کارونه له ټکني کېدو ژغورلي وای. دوی وايي، حکومت باید په خپلو ورته پرېکړو کې د خلکو نظر واخلي، ترڅو د دوی ستونزې په پام کې ونيول شي.
د کابل اوسېدونکی سېد عصمتالله هاشمي وايي: « له چارواکو یوه ګیله لرم، هغه دا چې د داسې کسانو په توګه چې چارې تنظیموي باید وړاندې له دې چې خپلې پرېکړې عملي کړي، خلکو ته دې یې په تړاو خبر ورکړي. باید خپل دلایل وړاندې کړي او خلکو ته قناعت ورکړي چې موږ په دې دلیل د دومره وخت لپاره انټرنېټ پرې کوو او تاسو خپل تدابیر ونیسي. اوس د انټرنېټ د پرېکدو له امله ټول هېواد دولتي او خصوصي سکټور دواړه فلج دي.»
د کابل اوسېدونکی سعیدالله وايي: « زما ټول کارونه د انټرنېټ له لارې ترسره کېږي. تاسو ګورئ چې انټرنېټ نه وي، زما کارونه فلج دي. له تېرو دوو ورځو راهیسې مې په کاروبار کې ډېر زیات زیان کړی. زما غوښتنه دا ده چې دا ستونزه دې په اساسي توګه حل شي.»
د کابل یو بل اوسېدونکی وايي: « زه له دولت غوښتنه کوم چې دا ستونزه هواره کړي. د خلکو پیسې بندې دي، الوتنې او ټرانسپورټ بند دی، دولتي او خصوصي خدمات بند دي. که دا ستونزه حل شي، ډېر به ښه شي.»
پر سوداګرۍ او دولتي چارو سربېره د انټرنېټ او مخابراتي خدمتونو بندېدو پر زده کړو هم اغېز کړی او چارې یې ټکنۍ کړې دي. د محصلانو په خبره، د درسونو ۷۰ سلنه مواد يې له انټرنېت ترلاسه کول، خو د انټرنېټ په پرې کېدو سره یې هرڅه په ټپه ودرېدل.
زده کړیال حشمت الله وايي: « موږ اکثریت درسي مواد له انټرنېټ څخه اخلو، لږ یې زموږ په کتابونو کې وي نور ټول له انټرنېټ اخلو. زه له دولت غوښتنه کوم چې په دې اړه پاملرنه وکړي، ترڅو زموږ محصلین خپلو درسونو ته ادامه ورکړای شي.»
حکومت د روانې اوونۍ د دوشنبې په مازدیګر په ټول هېواد کې انټرنېټې او مخابراتي خدمتونه پرې کړل او د چهارشنبې ورځې تر ماښام پورې یې ادامه لرله. چارواکو او اړوند ادارو د مخابراتي او انټرنېټي خدمتونو د پرېکولو په تړاو هېڅ ډول وضاحت نه دی ورکړی.
