د بګرام نظامي اډې په اړه د امريکا ولسمشر وروستیو څرګندونو ته له څو ورځني ځنډ وروسته، روسيې هم غبرګون وښود. د افغانستان لپاره د دې هېواد ځانګړي استازي په دې اړه د ډونالډ ټرمپ څرګندونې تېروتنه ګڼلې او وايي، د نظامي حضور لرلو لپاره افغانستان ته د امريکا راګرځېدل به واشګټن ته نه جبران کېدونکی زيان ورسوي.
ضمیر کابلوف په افغانستان کې د لسيزو جګړو موجوده تجربې ته په اشارې زياته کړې، د بګرام نيول ښايي امريکا له ناورين سره مخ کړي. نوموړي د ټرمپ دا څرګندونې د کاناډا او ګرين لنډ نیولو په اړه د نوموړي څرګندونو ته ورته بللې دي.
د افغانستان لپاره د روسیې ځانګړي استازي ضمیر کابلوف ویلي: « افغانستان ته د امریکا بیا راتګ به واشنګټن له بحران سره مخ کړي، ځکه افغانان له جګړې سره نااشنا نه دي. د بګرام په تړاو د امریکا ولسمشر ډونالډ ټرمپ خبرې د ګرین لنډ او کاناډا په اړه د نوموړي د څرګندونو په څېر دي.»
په همدې حال کې ځيني مطرح سياستوال وايي، امریکا دې له زور ویلو ډډه وکړي او خپل توان او ظرفیت دې د جګړو رامنځته کولو په ځای، د نړیوالې سولې د تأمین لپاره وکاروي. د دوی په خبره، امریکا د یو ځل بيا افغانان د بګرام په نيولو نه ګواښي.
پخوانی جهادي مشر ګلبدین حکمتیار وايي: « پوهېږم چې بګرام غواړې، جدي هم ښکارې او له پایلو یې هم بې پروا یې. خو پوه شه چې ستا دغه سیاستونه به د امریکا پر زوال منتج شي او تاریخ به تاته د ستایلو وړ فاتح نه بلکې د امریکا بریژنېف نوم درکړي.»
کارپوهان بیا وايي، امریکا به د بیاځل لپاره افغانستان ته د راګرځېدو تېروتنه تکرار نه کړي. د دوی په باور، د امریکا په شمول نړۍ په دې پوهیږي چې افغانانو ته نه بهرنی یرغل او نه یې تر یوغ لاندې حکومت د منلو دی.
د سیاسي چارو شنونکی توریالی ځاځی وايي: « امریکا به بیا ځل دا قدرت ونه لري چې پر افغانستان نظامي یرغل وکړي، ځکه چې بګرام په افغانستان کې پروت دی نه افغانستان په بګرام کې. دا امریکا دا کړنه د هېڅ افغان لپاره د منلو نه ده.»
د سیاسي چارو شنونکی معین ګل څمکنی وايي: « افغانانو د تاریخ په اوږدو کې له دې مشخصې جغرافیې څخه د ځان به بیه دفاع کړې او کوي یې. د افغانانو په وینه کې یو څه ګډ شوي، هغه دا چې هېڅ بهرني قدرت ته اجازه نه ورکوي چې دوی تر خپل نفوذ لاندې راولي.»
دا غبرګونونه له هغې را وروسته را روان دي چې د امریکا ولسمشر ډونالډ ټرمپ دوه ورځې وړاندې د بګرام هوايي اډې د بیا ترلاسه کولو په تړاو څرګندونې وکړې. کتونکي په دې باور دي چې په افغانستان کې امنیت ټینګ دی، هېوادونو ته ترې ګواښ نه پېښيږي او د بهرنیو ځواکونو حضور ته په کې اړتیا نه شته.
