پوهنتونونو او ثانوي زده کړو ته د نجونو پر لاسرسي د محدویت له لګېدو د درې نیم کالو په پوره کېدو سره، د ملګرو ملتونو د ماشومانو ملاتړ صندوق(یونیسف) اجراییوي مرستیال وايي، په افغانستان کې به د نجونو زده کړو تر تامين پورې خپلو هلو ځلو ته ادامه ورکړي.
نوموړي زیاته کړې، افغانې نجونې له دوی د زده کړو ادامې غوښتنه کوي او په خبره یې، دوی به هم د زده کړو لپاره خپل هڅې جارې وساتي.
د یونیسف اجراییوي مرستیال تدچایبان ویلي: « یونیسف غواړي په افغانستان کې د نجونو له زده کړو ملاتړ ته دوام ورکړي، ترڅو نجونې وکړای شي خپلې زده کړې بشپړې او دغه راز وکولی شي خپلو هیلو ته ورسېږي.»
نوموړي دغه څرګندونې کندوز ولایت ته د سفر په لړ کې په سي درک سیمه کې د نجونو له یوه لنډمهاله ښوونیز مرکز څخه د لیدنې پر مهال کړې.
اسلامي امارت د نجونو پرمخ د پوهنتونونو د پرانیستنې په تړاو څه نه دي ویلي، خو تر دې وړاندې یې پر زده کړو د محدوديت پرېکړه لنډ مهالې بللې وه.
تازه د اسلامي امارت ویاند ذبیح الله مجاهد د ملګرو ملتونو د سرمنشي انټونیو ګوټرېش وروستۍ څرګندونې رد کړې دي او وایي، هېواد کې د ښځو او نرانو په تړاو تکلارې د اسلامي شریعت پر بنسټ تنظیم شوې او هېڅکله د نورو د خوښې لپاره نه شي بدلېدای.
مجاهد زیاته کړې، د افغانستان د حالاتو او اسلامي اصولو په اړه د کافي پوهې نه لرل د دې لامل ګرځي چې نړیوال چارواکي د نامناسبو اصطلاحاتو کارولو ته مخه کړي.
د اسلامي امارت ویاند ویلي: « موږ د ملګرو ملتونو د سرمنشي هغه بې مسوولیته څرګندونې په کلکه غندو چې په افغانستان کې یې د ښځو په اړه اقدامات احمقانه بللي وو. د ملګرو ملتونو مشر باید د خپلو خبرو او الفاظو معنا ته متوجه وي او بې سنجشه توري ونه کاروي. په افغانستان کې د ښځو او نرانو په اړه قوانین او لارښونې د اسلامي شریعت په اساس او له هغو سره مطابق دي.»
د ملګرو ملتونو سرمنشي انټونیو ګوټرېش تر دې وړاندې افغانستان کې د ملګرو ملتونو په ادارو کې د ښځو پر کار د بندیز پرېکړه هم ننګولې وه.
کارپوهان وایي، د ټولنې د پرمختګ او کورنیو د اقتصادي ودې لپاره د نجونو لپاره د زده کړو زمینه برابره شي.
د نړیوالو اړیکو کارپوه سمیر انګار وايي: « د اسلامي امارت تګلاره د شریعت پر بنسټ ده او نړیوالې ټولنې ته هم په کار ده چې ورته درناوی ولري. د نجونو تعلیم د راتلونکي لپاره مهم دی او اسلامي امارت باید د شریعت په رڼا کې ورته حل لاره ولټوي.»
دا په داسې حال کې ده چې د پنجشنبې په ورځ د ملګرو ملتونو د ماشومانو وجهي صندوق(یونیسف) خبرداری ورکړی و چې په افغانستان کې د نجونو پر زده کړو محدوديت لګول د هېواد د دوامداره ثبات او پرمختګ پر وړاندې جدي خنډ دی او د دوی د اروزنې له مخې، د ۲۰۲۵ کال تر پایه به څه باندې ۲.۲ میلیونه افغان نجونې له زده کړو بې برخې پاتې شي.
