د رئیس الوزرا محمد حسن اخوند پر مشرۍ د اسلامي امارت موقتې کابینې د پنجشنبې ورځ په ناسته کې د افغانستان د تېر حکومت ځینې ادارې لغوه کړي او په ځینو کې یې د بدلون امر شوی دی.
د کابینې د پریکړې له مخې په پارلماني چارو کې د دولت او سولې چارو کې د دولت وزارتونو ترڅنګ د ټاکنو او ټاکنیزو شکایتونو خپلواک کمیسیونونه هم له دې وروسته لغوه اعلان دي.
پریکړه کې د بشر حقونو خپلواک کمیسیون سرنوشت په اړه ویل شوي،چې فعالیت به کوي،خو په نوم کې به یې بدلون راځي.
اخوا د سیاسي چارو یو شمېر شنونکي د کابینې له تازه پریکړې هرکلی کوي،ځکه په وینا یې یوازې د سولې وزارت میلیونونه ډالر ولګول، خو هېڅ پایله یې نه درلوده.
شنونکی هاتف مختار وايي:« کوم وزارتونه چې تازه لغوه شوي دي، د افغانستان لپاره یې هیڅ ګټه نه کوله، بلکې د ملت له پیسو یې میلیونونه ډالر اخېستل او د څو اشخاصو جیبونو ته به تلل. دا پریکړه د ملي ګټو په رڼا کې شوې او هغه وزارتونه چې لاسته راوړنه نه لري،باید لغوه شي. د بشرحقونو کمېسیون څخه دفاع کوو او هېله مو ده،چې دا کمېسیونه ژر فعال شي.»
کابینې د چارو ادارې ته امر کړی دی،چې په راتلونکې یوه میاشت کې دې د مالیې او نورو اړوندو ادارو په همغږۍ د لغوه شویو ادارو کارکوونکو د سرنوشت، معاشونو او منقولو او غیر منقولو جایدادونو په اړه اقدام وکړي.
د افغانستان اسلامي امارت ویاند مرستیال انعام الله سمنګانی وایي، په اوس کې یادو ادارو ته اړتیا نه لیدل کېده،خو که اړتیا پیدا شوه،بېرته به فعالیت پیل کړي.
د لغوې په دې لړۍ کې ۸۵ هغه تشکیلات هم له منځه تللي دي، چې په کې د ولسمشر ځانګړي استازي او د ولسمشر او وزیرانو ستر سلاکاران شامل دي.
دې سره پریکړه شوې ده،چې د ملي شورا دارالنشاوې او پر اساسي قانون د څار کمېسیون به ساتل کېږي او د پایتخت زون د پرمختګ اداره به د ښار جوړونې وزارت کې د معینیت په کچه ادغام کیږي.
اسلامي امارت له دې وړاندې د ښځو چارو وزارت لغوه کړې و او پر ځای یې د امر بالمعروف او نهی عن المنکر وزارت ته په کابینه کې ځای ورکړی دی.
