د افغانستان بهرنیو چارو وزارت سیاسي مرستیال شېر محمد عباس ستانکزی وايي، دامریکا اوسنی دریځ اوږدمهالی نه دی او په افغانستان کې امریکا او غرب ګټې لري،چې د ساتلو لپاره یې نهغواړي افغانستان له پامه وغورځوي.
ستانکزی زیاتوي:« امریکا نه شي کولی افغانستان په بشپړ ډول له خپله پامه وغورځوي،ځکه افغانستان د منځنۍ آسیا له مهمو هېوادونو دی او د امریکا په کې خپلې سیاسي، اقتصادي او نورې ګټې خوندي دي.»
پرافغانستان د امریکا له خوا د لګېدلو بندیزونو سره سره یو شمېر هېوادونو کابل سره خپلې بشري مرستې او ديپلوماتیکې اړیکېجاري ساتلي او دا ددې ښکاروندی کوي، چې امریکا هڅوي،ترڅو د افغانستان په اړه خپل دریځ نرم کړي.
روسیې او چین هم له امریکا سره په دې اړه جدي دریځ غوره کړی او له سپینې ماڼۍ یې غوښتي دي، چې بندیزونه د حل لار نه ده.
اوس د امریکا د بهرنیو چارو وزارت وایي، دوی له ملګرو ملتونو سره کار کوي،چې افغانستان سره نغدي مرستې وکړي.
د یاد وزارت ویاند نیډ پرایس وايي، امریکا په یوازې توګه داهرڅه نه شي کولای.
پرایس زیاته کړه:« نور هېوادونه، د بېلګې په توګه نژدې هېوادونه، د سیمې هېوادونه یا له سیمې وراخوا شته او باید د افغانانو لپاره ډېر څه وکړي. موږ د ملګرو ملتونو سازمان له بېلا بېلو ادارو سره ګډ کار کوو،چې نه یوازې بشري مرستې،بلکې نغدې پیسې هم افغانستان ته ولېږل شي.»
له دې سره ملګرو ملتونو ته د اسلامي امارت له لوري پیژندل شوي استازي سهیل شاهین ویلي،د امریکا له لوري پر افغانستان د لګېدلو بندیزونو دوام د بشرحقونو خوندیتوب نه دی، بلکې دا د ولس لپاره سزا ده.
