د اریوب ځاځیو ولسوالۍ یو تن اوسېدونکی وايي:« دلته هر څه فعاله دي، امن دی، ولسوالۍ کې محکمه فعاله ده،ګڼ مسایل یې حل کړي او تر اوسه پورې له چا سره زیاتی نه دی شوی.»
د اریوب ځاځیو اوسیدونکي وایي، که لجه منګل او احمدخیلو کې جلا محکمې فعالې شي،د ګڼې ګوڼې مخه به نیول شوي وي او د دوی قضایاوو ته به پر وخت رسېدنه کېږي.
د اریوب ځاځيو ولسوالۍ یو تن اوسېدونکی عزت الله و ايي:« دلته لنډ وخت کې ډېر پخواني مسایل حل شوي دي،خو زموږ غوښتنه دا ده،چې نورو ولسوالیو کې جلا محکمې فعاله شي،ترڅو زموږ ستونزو ته پر وخت رسېدنه وشي.»
د اریوب ځاځیو ولسوالۍ ولسوال ظاهرګل وایي، د اسلامي امارت د پخواني طرزالعمل له مخې، د څو ولسوالیو پر سر یوه محکمه فعاله ده او د نوي طرز العمل په جوړیدو سره ټولو ولسوالیو محکمې به فعاله شي.
ظاهر ګل زیاته کړه:« اریوب ځاځیو ولسوالۍ کې دا مهال د اریوب، احمدخیلو او لجه منګل ولسوالیو لپاره محکمه فعاله شوې،د خلکو ستونزو ته رسېدنه کېږي. د اسلامي امارت د نوي طرزالعمل له مخې چې لا وروستی شوی نه دی، ټولو ولسوالیو کې به محکمې فعالې شي.»
د اسلامي امارت په راتګ سره دولتي محاکمو ته د خلکو تګ زیات شوی او ډېری وخت هغه قضایاوې بیا ځلي هم محاکمو ته وړاندې کېږي،چې پخواني حکومت کې پرې پریکړې شوې وې او پلې شوې نه وې.
