په کابل کې نن یکشنبه د «۱۴۰۰ کال د لېندۍ پر ۲۸ مه » د مبارز انسان علامه عطاءالله فیضاني د ۴۹ م تلین په مناسبت ناسته جوړه شوې،چې ګډونوالو په کې د فرد او ټولنې پر اصلاح ټینګار وکړ.
د ناستې ګډونوال وايي، فیضاني فرد نه، بلکې یو فکر و،چې د غوښتل یې خلک له خدای سره وصل کړي.
دوی د اسلامي امارت له چارواکو غوښتنه وکړه،چې چې کار اهل کار ته وسپاري او سپارښتنه یې وکړه،چې په تاوتریخوالي او د نورو پر حذف ټولنه نه جوړېږي.
د پوهنتون استاد سید احمد کاظمي وايي:«په تاوتریخوالي، تبعیض، د نورو پر حذف او د توپک په میل پرمختللې ټولنه نه جوړېږي.»
د ناستې ګډونوال وايي، په ټولنه کې باید عدالت پلی شي او د خلکو د اقتصادي ستونزو د حل لپاره کار وشي.
دوی وايي، که سیاسي پوستونو کې هر څوک وي، پروا نه کړي، خو مسلکي پوستونه باید اهل کار ته وسپارل شي.
د پوهنتون استاد سید مبین هاشمي وايي:« تېرو شل کلونو کې هم ټامیان راغلي وو، یو کس به طب ویلی و، په لوی پوسټ کې به یې کار کاوه، بل به کمپیوټر ساینس ویلی و، امنیت شورا کې به یې کار کاوه، دا په هر ځای کې دی . موږ د چا پر سیاسي پوستونو کې کار نه لرو، خو په هغه پوستونو کې چې تخصص په کار وي، پوهه او تجربه کار وي، نو ښه ده، چې مسلکي کسان هلته وګومارل شي.»
اسلامي امارت بیا تل ټینګار کړی دی،چې په نظام کې ټولو ته ځای شته دی،خو لا هم د ټول شموله حکومت پر سر د اسلامي امارت او نړیوالو تعریف یو نه دی.
