د پاکستان له خوا افغان کډوالو ته د ورکړل شوي ضرب الاجل نږدې کېدو سره له دې هېواده د افغان کډوالو د راستنېدو لړۍ یو ځل بیا چټکه شوې او هره ورځ سلګونه کورنۍ د تورخم له لارې هېواد ته راستنیږي.
راستانه شوي هېواد وال وايي، هلته ترې د کور توکي او وسایل ایسار شوي دي.
له پاکستانه راستون شوی سراج الدین وايي: « کاروبارونه همداسې پاتې دي، د چا کاډي هغه خواته ولاړ دي، د چا د کور غړي او د چا هم د کور سامان پاتې دی. باید دواړه ملکونه سره کېني او دا خبره وکړي چې کډوال په عزت سره راواړوي. هغه کسان ډېر زلیله کېږي چې دیخوا را روان دي.»
له پاکستانه راستون شوی اورنګزېب وايي: « د وتلو لپاره یې لږ وخت ورکړی و، له چا سامانونه پاتې شول او له چا هم کورونه. دوی کډوال لاس تړلي ونیول، تاڼو ته یې واچول، په داسې حال کې چې هرڅه یې هلته پاتې دي.»
راستانه شوي خپل هېواد ته په راتګ خوښ دي او په خبره یې د ارامۍ احساس کوي.
دوی ټینګار کوي چې حکومت دې په کور دننه ورته کاري زمینې برابرې کړي.
له پاکستانه راستون شوی ګل ولي وايي: « وطن ته په راتګ ښه خوشاله یو، دلته هم هرڅه انتظام برابر دی او پوره کمک سره کېږي.»
له پاکستان راستون شوی شهاب الدین وايي: « له حکومت دا هیله لرو چې موږ په خیر سره تر خپلو مېنو ورسوي. اوس مهال موږ سره هېڅ هم نشته، غواړو لږ ځمکې راکړي.»
تورخم کې د کډوالو عمري کمپ مسوولین وايي، دوی د کډوالو راتګ ته پوره چمتو والی لري او د کډوالو د موقتي مېشتېدنې او د هغوی د سمبالښت په موخه یې بېلابېلې کمېټې فعالیت کوي.
د کډوالو عمري کمپ مسوول هاشم میوند وال وايي: « چمتوالی ورته نیول شوی، له ۱۴ تر ۱۵ سوو نوې خېمې ورته درول شوې دي. کوم مهاجر چې راځي، تر ثبت او راجسټر وروسته وځي خپلو مېنو ته ځي. د مشرانو له خوا هدایت شوی او ډاډ راکړل شوی، که اړتیا شي، نورې خېمې هم را استوي.»
د کمپ مسوولین له نړیوالو مرستندویه ادارو او خیریه موسسو هم غوښتنه کوي چې د دې څپې په ښه مدیریت کې ورسره همکاري وکړي او له کډوالو سره خپلو مرستو ته دوام ورکړي.
هاشم میوند وال په دې اړه وايي: « له دې وروسته د مهاجرو راتګ زیاتېږي، زموږ غوښتنه دا ده چې خپلې مرستې زیاتې کړي، نور ډونران را جذب کړي، ترڅو د مرستو په برخه کې تشه رامنځته نه شي.»
د مسوولینو د مالوماتو پر اساس، له تېرې یوې اوونۍ راهیسې ۳ زره ۵۰۰ کورنۍ د تورخم له لارې هېواد ته راستنې شوې او د مرستو له ترلاسه کولو او اسنادو پروسېس وروسته، خپلو سیمو ته انتقال شوې دي.
