۶۰ کلن محمد نادر په پاکستان کې له کلونو کډوالۍ وروسته تازه هېواد ته راستون شوی.
د ده په خبره، هلته پاکستاني ځواکونو په زور له کوره ایستلی او له کورنۍ سره یوځای یې افغانستان ته راشړلی، خو د کور وسایل او شتمني ترې پاتې شوي دي.
هغه زیاته کړې: « له موږ سره په پاکستان کې ډېر ظلم وشو، اوس یې کار کولو او ان ژوند کولو ته نه پرېښودلو. زما په کور یې چاپه ووهله او زه یې سره د کورنۍ له غړیو را واړولم، خو د کور ټول سامان مې هلته پاتې شو. موږ دلته هېڅ هم نه لرو، آسمان مو بړستن ده او ځمکه مو توشکه.»
د پاکستاني پولیسو له دې بد چلن سره مل یوازې محمد نادر افغانستان ته نه دی راستون شوی بلکې دلته د کندهار ولایت په تخته پول ولسوالۍ کې د انځرګي په نوم د کډوالو لنډمهاله پنډغالي کې نور کډوال هم ورته شکایت لري او وايي، د پاکستان امنیتي ځواکونو يې پر کورونو چاپې وهلې دي، قېمتي توکي او پیسې یې ترې ګرځولي او زندان ته یې اچولي دي.
راستانه شوي کډوال له اسلامي امارت د لومړنیو اسانتیاوو برابرولو غوښتنه کوي.
تازه راستون شوی محمد عالم وايي: « په کورونو یې چاپې ووهلې، ځینې وسایل مو وپلورل، خو ډېر لا پاتې دي. یوازې سرونه مو را ایستلي، دومره څه نه لرو چې ویې خورو یا یې وڅښو. »
زنداني شوی او بیا کندهار ته راشړل شوی علي خان وايي: « له موږ سره ډېر زیاتی وشو، زما کور په ژوب بازار کې و، زموږ په کور یې چاپه ووهله او دا دی په تش لاس یې افغانستان ته را وشړلم.»
د کندهار سيمه ییزو مسوولينو په وینا، تېره یوه میاشت کې ۲ زره کورنۍ چې د غړو شمېر یې شاوخوا ۱۱ زره تنو ته رسیږي او همدارنګه۳ زره ۵۰۰ هلته زنداني شوي افغان کډوال هېواد ته راستانه شوي، خو په دې وروستیو کې دا لړۍ د پخوا په پرتله چټکه شوې ده.
انځرګي پنډغالي کې د کډوالو آمریت د ثبت مدیرعبدالطیف حکیمي وايي: « په تېره یوه میاشت کې د راستنېدونکو مهاجرینو ګراف لوړ شوی او زموږ د شمېرو له مخې، ۲ زره کورنۍ راستنې شوې دي چې د غړیو شمېر یې شاوخوا ۱۱ زره تنه کېږي. همدارنګه په تېره یوه میاشت کې تر ۳ زره ۵۰۰ تنو پورې قیدیان هم راستانه شوي. یوازې تېره شپه تر ۲۰۰ پورې قیدیان او ۱۱۰ کورنۍ راغلي دي.»
پاکستان په دې هېواد او خیبرپښتونخوا کې د مېشتو نږدې یو نیم میلیون پي.او.آر کارت لرونکو افغان کډوالو ته د روانې اګست میاشتې تر وروستۍ نېټې د اوسېدو وخت ورکړی، خو یو شمیر افغان کډوال وايي پاکستان کې د پي.او.ار کارت لرونکي ځینې افغانان وار دمخه له کورونو ایستل شوي دي.
