افغانستان کې د داعش خراسان ډلې د حضور په تړاو د ملګرو ملتونو او د چین او پاکستان استازو د ادعاوو یوه ورځ وروسته، تازه د ایران استازي د ملګرو ملتونو امنیت شورا ناسته کې ورته څرګندونې کړي.
دغه غونډه چې د منځني ختیځ د امنیت په تړاو بلل شوې وه، ملګرو ملتونو کې د ایران دایمي استازي امیرسعید ایرواني ادعا کړې چې کواګې ځینې ترهګریز عناصر او بهرني جنګیالي د سوریې له لارې افغانستان ته لېږدول کېږي.
ایرواني په دې اړه اندېښنه ښودلې او سربېره پر دې دغه مساله یې د ګاونډیو او د سیمې هېوادونو لپاره ګواښ ګڼلې په دې برخه کې یې پر ګډې جدي مبارزې ټینګار کړی.
هغه زیاته کړې:« موږ په جدي ډول له هغو کره راپورونو په اندېښنه کې یو چې ښيي ځینې ترهګریز عناصر او بهرني ترورستي جنګیالي له سوریې افغانستان ته لېږدول کیږي. هغه مساله چې په مستقیم ډول د افغانستان ګاونډیو او د سیمې ټیکاو ته ګواښ ګڼل کیږي. پر دې ټینګار کوو چې ټول هېوادونه باید په بشپړ ډول له ترهګرۍ سره د مبارزې په برخه کې په هر ډول او بڼه له نړۍوالو قوانینو سره موافق عمل وکړي.»
اسلامي امارت د بهرنیو خپلسریو جنګیالیو د حضور په تړاو د یاد ایراني چارواکي ادعاوې رد کړي او دغه څه یې په لوی لاس د افغانستان د بې ثباته ښودلو هڅه بللې.
د اسلامي امارت مرستیال ویاند حمد الله فطرت په دې اړه غبرګون کې ویلي، د ورته ادعاوو د اثبات لپاره له کره شواهد او مدارکو پرته تورونه د اندېښنو له زېږدولو پرته هېڅ لوري ته ګټه نه رسوي.
هغه زیاته کړې:« د امنیت په شورا کې د ځینو هېوادونو هغه تشویشونه بې ځایه دي چې وايي په افغانستان کې د نورو هېوادونو خپلسرې ډلې شتون لري. په داسې حال کې چې موږ دغه ادعاوې ردوو، له هغو ټولو جهتونو چې په دې اړوند تشویش اچوي، غوښتنه کوو چې بې دلیله دې د افغانستان د بې ثباته ښودلو کوښښ نه کوي. داسې هېڅ شواهد شتون نه لري چې ورته ادعاوې ثابتې کړي.»
بل پلو د سیاسي چارو کارپوهان د ایران له ګاوڼډ سوریې افغانستان ته د جنګیالیو راتګ او د انتقال ادعا پخپله د تعجب وړ مساله ګڼي.
دوی داعش بهرنۍ پدیده ګڼي چې په عراق او سوریې کې راټول شوې چې افغانستان پورې اړه نه بلکې افغانان یې پخپله قربانیان دي.
د سیاسي چارو شنونکی سلیم پيګیر وايي:« که چیرې له کوم هېواد ترهګر افغانستان ته دننه کېږي، لکه څنګه چې دوی وايي، نو طبیعي ده چې یو هېواد به ورسره مرسته کوي. ایرانیان باید پوه شي چې دوی له سوریې سره پوله لري، نه افغانستان. »
د سیاسي چارو شنونکی شیر حسن حسن وايي:« لکه څرنګه چې له نوم یې مالومېږي چې دولت اسلامي عراق او سوریه، عراق او شام، د دوی بنسټ هملته اېښودل شوی او افغانستان ته دغه فکر له هماغه ځایه راغلی دی.»
دا په داسې حال کې ده چې له دې وړاندې د اسلامي امارت په بار بار په افغانستان کې د بهرنیو جنګیالیو حضور او له دې ځایه ګاونډ، سیمې او نړۍ ته د ګواښ پېښولو اندېښنې بېځایه بللي او ډاډ یې ورکړی چې نه پرېږدي افغان خاوره د نورو پر وړاندې د منفي اهدافو لپاره وکارول شي.
