د سرپل ولایت له مرکز سره د بلخاب ولسوالۍ نښلوونکی سړک، هغه لاره ده چې پرې تګ راتګ له خورا ننګونو ډک دی.
ځایي اوسېدونکي وایي، دغه ولسوالۍ په پراخه کچه د ډبرو سکرو کانونه لري اوهره ورځ ترې سلګونه ټنه سکاره استخراجېږي او زیات عواید ترې تر لاسه کېږي.
دوی ورځ تربلې د دې لارې ویجاړېدو ته اندېښمن دي.
دوی له ولایتي مسوولینو او اړوند ادارو په دې اړه د جدي پاملرنې غوښتونکي دي.
د بلخاب ولسوالۍ یو تن اوسېدونکی میرویس وايي: « له بده مرغه د سیمې مواصلاتي سړکونه د هغو بار وړونکو موټرو د تردد له امله ویجاړ شوي چې د ډبرو سکاره لېږدوي. د افغانستان له اسلامي امارت هیله لرو چې د دې سړک بیا رغولو ته ډېره پاملرنه وکړي.»
د بلخاب ولسوالۍ یو بل اوسېدونکی شېراحمد وايي: « دا سړک د ټکرونو، چپه کېدنو، ښویېدلو، باریکیو او کندو په څېر ستونزې لري چې باید پاملرنه ورته وشي.»
په ډبرو سکرو بار لارۍ موټرو نه یوازې دغه مسیر او لاره ویجاړه کړي بلکې د سیمې اوسېدونکو په خبره، چاپېریال او سړک ته نېږدې کرنیز کښتونه او تازه مېوې یې هم زیانمنې کړې دي.
د بلخاب ولسوالۍ اوسېدونکی خیال محمد وايي: « د درنو بار وړونکو موټرو تګ راتګ زموږ پر چاپېریال هم منفي اغېز کړی. د دغو موټرو خاورې او دود د خلکو پر کرنیزو محصولاتو پرېوځي او د هغو ماشومانو پر روغتیا یې ناوړه اغېز کړی چې له دې سړک تګ راتګ کوي یا په هغو کورونو کې اوسېږي چې سړک ته نږدې دي.»
د بلخاب ولسوالۍ اوسېدونکی جاوید وايي: «شاوخوا درې کاله وړاندې د ملي پراختیا شرکت راغلی او د ډبرو سکرو د استخراج قرارداد یې وکړ. له خلکو سره یې ژمنه وکړه چې په بدل کې به یې سړکونه جوړ کړي؛ خو اوس له ویجاړو سړکونو پرته کوم بل څه موږ ته پاتې نه دي.»
په ورته وخت کې چارواکي بیا وایي، د دې لارې رغولو پلان لري او ډاډ ښي چې چارې به يې په نېږدې راتلونکې کې پیل شي.
د سرپل والي ویاند حبیب الله مسرور وايي: « د سرپل ولایت مقام او د دې ولایت محلي اداره ژمن دي چې د دې ولایت سړکونه په غوره بڼه جوړ کړي.»
د ټولګټوچارو وزارت ویاند محمد اشرف حق شناس وايي: « هرکال د سړکونو د ساتنې او رغونې لپاره د یو شمېر پروژو قرارداد له خصوصي سکټور سره کېږي. همدارنګه د ټولګټو وزارت ولایتي ریاستونه او اړوند ټیمونه هم د سړکونو څارنه او مراقبت کوي. موږ هېوادوالو ته ډاډ ورکوو چې د ټولګټو چارو وزارت تل هڅه کړې او کوي یې چې د سړکونو جوړونې او ساتنې له لارې خلکو او ملي سوداګرو ته لا ډېرې اسانتیاوې برابرې کړي.»
د سرپل بلخاب ولسوالۍ له ۱۰۰ زرو ډېر نفوس لري. دا ولسوالي له مرکز سرپل شاوخوا ۲۰۰ کلیومټره لرې غرنیزه ساحه کې موقعیت لري چې په کې له ۵۰۰ ډېر د ډبرو سکرو کانونه موجود دي.
له دې ټولو سره، اساسي غوښتنه داده چې د ډبرو سکرو له عوایدو باید د دې سړک رغونه وشي.
