د پاکستان پوځ لوی درستیز عاصم منیر په خپلو تازه څرګندونو کې یوځل بیا د افغانستان پر حکومت په دې هېواد کې د فعالو وسله والو ډلو د ملاتړ تور پورې کړی.
ځينو پاکستاني رسنیو راپور ورکړی چې هغه په بروکسېل کې له رسنیو سره په خبرو کې د افغانستان اوسني حکومت ته خبرداری ورکړی چې د ډیورنډ فرضي کرښې له لارې دې د پاکستان تر کنټرول لاندې سيمو ته د وسله والو لېږلو هڅې نه کوي.
عاصم منير ویلي، هېواد یې له اوږدو کلونو راهیسې پر افغانانو ګڼ احسانونه کړي، خو د نوموړي د ادعا پر اساس په بدل کې یې افغانستان د هند په همکارۍ د دې هېواد پر وړاندې دسیسې جوړوي.
د پاکستان د پوځ لوی درستیز ویلي: « موږ له تېرو اوږدو کلونو راهیسې له افغانانو سره مهرباني او احسانونه کړي، خو د جبران پر ځای د هند په همکارۍ زموږ پر وړاندې دسیسه جوړه شوې ده.»
هغه د هر پاکستاني وګړي له ژوند او سر ساتنه د ځان مسوولیت ګڼي او افغان لوري ته ګواښ کوي چې د دوام په صورت کې به غبرګون او ځواب ورکړي.
د اسلامي امارت حکومت زموږ له اړیکو سربېره په دې اړه څه نه دي ویلي، خو له دې وړاندې یې ورته تورونه په کلکه رد کړي او دا ډول ادعاوې یې د امنيت په ټينګولو کې د دې هېواد پاتې راتلل بللي.
د اسلامي امارت حکومت پر اسلاماباد غږ کړی چې خپل امنیت په خپله ټینګ کړي او د ورته متوجه مسوولیتونو بار دې پر نورو نه اچوي.
د سیاسي چارو شنونکی توریالی ځاځی وايي: « پاکستان د افغانستان او افغان ملت پر وړاندې ډېر زیلانه سیاست او جنایتکارانه اجنډا لري. ما تل ویلي چې د پاکستان، ایران او هغو هېوادونو په خبرو باید باور ونه شي چې پر افغانستان یې نظامي یرغل کړی.»
د سیاسي چارو شنونکي وايي، پاکستان په تېرو څلورو کلونو کې د تورونو نوې لوبه روانه کړې او امریکا ته د دې هېواد د پوځ لوی درستیز وروستیو پرله پسې سفرونو موخه هم د همدې لوبې یوه برخه ګڼي.
د دوی پر باور، نوموړی ښايي په دې اړه له امریکايي امنیتي او پوځي چارواکو سره هم غږېدلی وي او په دې اړه یې له هغه اړخه مشخصه اجنډا هم اخیستې وي.
د سیاسي چارو شنونکی شهسوار سنګروال وايي: « پاکستاني جنرال په دې وروستیو کې امریکا ته تګ راتګ زیات کړی او زه فکر کوم چې دوی بیا د یوې دسیسې په لټه کې دي. په بروکسېل کې د هغه له تازه څرګندونو ښکاري چې غواړي دلته یوې بلې توطیې ته لاره پرانیزي. د دې امکان هم شته چې په دې اړه یې له ځینو امریکايي چارواکو سره خبرې هم کړې وي. دا تورونه د هغو نورو تورونو په څېر دي چې دوی بار بار پر افغانستان لګولي او وايي چې ټي.ټي.پي، القاعده او نورې ډلې په افغانستان کې دي.»
دا داسې مهال ده چې پاکستان که له یوې خوا د افغانستان له اوسني حکومت سره تر یوه بریده د همکارۍ او د اړیکو د نږدېوالي دعوې کوي، خو له بلې خوا په خپله د اسلامي امارت له مخالفینو سره په پټه او ښکاره د دوستۍ او خبرو اترو غاړه نیسي.
د همدې خبرو د اثبات لپاره تازه پاکستان د روانې اګست میاشتې په ۲۵مه او ۲۶مه په پلازمېنه اسلاماباد کې د اسلامي امارت د سیاسي مخالفینو د ناستې کوربتوب کوي.
