ملګري ملتونه وايي، په افغانستان کې د سرپرست حکومت له واکمنېدو راهیسې ښځې او نجونې له خپلو حقه حقونو محرومې کړای شوې او دا وضعیت د نورمالېدو یا عادي کېدو له خطر سره مخ دی.
د ملګرو ملتونو د جنسيتي برابرۍ اداره وايي، سرپرست حکومت په افغانستان کې د خپل لیدلوري له مخې د داسې یوې ټولنې رامنځته کول تر بل هر وخت ډېر نږدې شوی چې ښځې په کې په بشپړ ډول له عامه ژونده حذف شوې وي.
د ملګرو ملتونو د جنسیتي برابرۍ ادارې ویلي: « په افغانستان کې د ښځو او نجونو لپاره اوسنی وضعیت په نړۍ کې د ښځو حقونو په برخه کې تر ټولو سخت بحراني حالت دی او دا وضعیت د منلو وړ نه دی. که د دې وضعیت په اړه بېړنی اقدام ونه شي، نو ښځې به په بشپړ ډول له ټولنې څنډې ته شي.»
د ملګرو ملتونو په دغه تازه رپوټ کې همدا راز راغلي، چې د ۲۰۲۱ کال د اګست له ۱۵مې راهیسې پر ښځو د سرپرست حکومت له لوري لګول شوي محدودیتونه لنډمهاله نه دي پاتې شوي.
په دې راپور کې د افغان نجونو او ښځو پر زده کړو، کار او عامه ژوند کې پر ونډې لګول شویو محدودیتونو ته هم اشاره شوې او ادعا کوي چې د دوی ژوند یې له ټولنیز، اقتصادي، رواني او روغتیايي پلوه اغېزمن کړی دی.
خو اسلامي امارت بیا د ملګرو ملتونو دغه راپور نه مني او بې بنسټه یې بولي.
د اسلاميامارت مرستیال ویاند حمد الله فطرت وايي، سرپرست حکومت له ښځو سره هېڅ راز زور زیاتي ته اجازه نه ورکوي او برعکس يې د هغوی حقونه خوندي کړي دي.
فطرت په دې اړه وايي: « دا ډول ادعاوې ناسمې دي چې ګواکي ښځې او نجونې په افغانستان کې له تاوتریخوالي، جبري او یا له وخت وړاندې نکاح سره مخ دي. اسلامي امارت له ښځو سره د هر ډول زور زیاتي، جبري نکاح، د کم عمره نجونو واده کولو او په بدو کې ورکولو مخه نیولې؛ ښځو ته په میراث کې حق ورکول کېږي او غږ یې اورېدل کېږي.»
د سیاسي چارو څارونکي بیا وایي، سرپرست حکومت اړ دی چې ټولو نجونو او ښځو ته د اسلام او افغاني کلتور په چوکاټ کې حقوق ورکړي، ترڅو رسميت ته د رسېدو هدف ترلاسه کړي.
د سیاسي چارو شنونکی سلیم پیګیر وايي: « د افغانستان اسلامي امارت مکلف دی چې د اسلام مبارک دین له ارشاداتو او افغاني فرهنګ سره سم، د ښځو ټول حقونه ورکړي. که غواړو چې د نړیوالې ټولنې له انتقادونو ځان خلاص کړو، باید دا ټول نزاکتونه مراعات او قوانین پاس کړو.»
ملګري ملتونه داسې مهال دا تازه راپور خپروي چې د يکشنبې په ورځ يې هم په افغانستان کې د بشري وضعیت په اړه يو راپور خپور کړی و.
په هغه راپور کې هم په افغانستان کې پر ښځو او نجونو لګول شویو محدودیتونو او ورسره د روان وضعیت په اړه مالومات او اندېښنې شریکې شوې وې، هغه چې سرپرست حکومت په کې شوې ادعاوې ناسمې ګنلې وې.
