د پاکستان بهرنیو چارو وزارت ویلي، پاکستان او افغانستان په رسمي ډول ډېپلوماټیکې اړیکې د سفیر کچې ته لوړې کړې دي.
د دې هېواد بهرنیو چارو وزارت دغه اقدام د کابل او اسلام اباد ترمنځ د دوه اړخیزو اړیکو عادي کولو په په برخه کې مهم ګام بللی.
د پاکستان بهرنیو چارو وزارت وياند شفقت علي خان یوه خبري کنفرانس ته ويلي، د دواړو هېوادنو شارژدافیرانو د دوه اړخیزې هوکړې له مخې د سفیر مقام ته ارتقا کړې.
هغه زیاته کړې: « د دواړو هېوادونو دوه اړخيزې اړيکې د سفيرانو پر کچه دي او زموږ په نظر دغه پروسه نوره تکمیل شوې او رسمي او تشريفاتو ته اړتيا نه شته.»
د اېکسپرېس ټرېبيون ورځپاڼې د راپور له مخې، د معمول په څېر سفیران باید خپل باورلیک د کوربه هېواد ولسمشر ته وسپاري، خو د افغانستان په اړه پاکستان د داسې تشریفاتو ترسره کول اړين نه دي ګڼلي.
شفقت علي خان د افغانستان د اوبو او انرژۍ وزارت سرپرست ملا عبداللطيف منصور هغه څرګندونې هم رد کړې چې له شمشاد سره په وروستۍ مرکه کې يې په تېر او اوس کې اسلاماباد په افغانستان کې د پياوړي مرکزي نظام رامنځته کېدو مانع ياد کړی و.
علي خان په دې اړه وايي: « دغه خبرې له عقل، تاريخ او حقايقو لرې دي او پاکستان تر نورو زيات د افغانستان په ثبات کې ګټې لري.»
نوموړي د اګسټ پر ۴مه اسلاماباد ته د مولوي اميرخان متقي سفر نه کېدو په تړاو يوې پوښتنې په ځواب کې ویلي، دغه سفر ته ځانګړې نېټه لا نه ده مشخصه شوې او د نېټې له ټاکل کېدو وروسته به يې رسمي اعلان وکړي.
د سیاسي چارو کارپوهان وايي، پاکستان د افغانستان پر وړاندې همېشه هغه ډول ډېپلوماټيکې اړيکې غوښتې چې يوازې د دوی ګټې يې خوندي کړې وي.
دوی له سرپرست حکومته غواړي چې د ملي ګټو خونديتوب ته په کتو دې له ګاونډیو هېوادونو سره اړيکې تعقيب کړي.
د سیاسي چارو شنونکی ادریس محمدي ځاځی وايي: « یعنې د افغانستان او پاکستان ترمنځ صرف د سفارت نه بلکې هغه سیاسي، اقتصادي او فرهنګي مشترکاتو کې هم د ښه والي قدمونه اوچت شي، ورته پالیسۍ جوړې شي؛ ترڅو د دوه مملکتونو ګاونډیتوب بریالی شي.»
له نږدې څلورو کلونو راهيسې اسلامي امارت په ډېپلوماټيک ډګر کې تر دې دمه يوازې د روسيې له لوري پر رسميت پېژندل شوی او چين، متحده عربي اماراتو، پاکستان، اوزبېکستان او ترکيې ته يې له رسميت پېژندنې پرته خپل سفيران لېږلي دي.
