له تېرو څو لسیزو راهیسې د کونړ پر سیند اوبه له يوه منظم حقوقي چوکاټ پرته پاکستان ته روانې دي او دا هېواد ترې پر کرنې سربېره، د برېښنا په توليد کې هم ګټه اخلي.
د اوبو او انرژۍ وزارت سرپرست ملا عبداللطیف منصور له شمشاد سره په ځانګړي مرکه کې ویلي، اسلامي امارت او د اوبو او انرژۍ وزارت پر ياد سيند د بند جوړلو لپاره قوي عزم لري او په دې اړه يې تخنيکي سروې هم بشپړه کړې.
منصور زياتوي، دغه بند ډېر امکانات غواړي او د دې بند جوړولو لپاره یې له یوه چینایي شرکت سره خبرې کړې دي.
منصور په دې اړه وايي: « د افغانستان اسلامي امارت او د اوبو او انرژۍ وزارت ټینګ عزم او عقیده لري چې پر کونړ سیند به بند جوړوي، خو له دې امله چې دا بند ډېر امکانات غواړي، جوړول یې د اسلامي امارت په وس نه ده پوره. موږ له یوه چینايي شرکت سره ډېر مخکې لاړو، حتا دې ځای ته سره ورسېدو چې قرارداد هم لاسلیک شي؛ خو لایې د رد جواب هم نه دی راکړی، خو د راتګ امکانات یې هم ډېر نه دي. موږ هرچاته دا خبره کړې چې د کونړ سیند ډېر مهم دی، باید برېښنا ترې تولید کړو او ګټه ترې واخلو.»
د نوموړي په خبره، د افغانستان د کورنیو اوبو مدیریت د افغانانو اساسي حق دی او د مدیریت لپاره یې په هېواد کې لویو مالي مرستندویانو ته اړتیا ده.
د اوبو او انرژۍ سرپرست وزیر وایي، د کونړ بند جوړول سیاسي اړخ نه لري او ډاډ څرګندوي چې عملي چارې به يې ژر پيل شي.
د اوبو او انرژۍ وزارت سرپرست عبداللطیف منصور وايي: « دا سیاسي تاوان هم نه لري، ځینې کسان تشویش کوي چې پاکستان به ستونزې جوړې کړي، خو په دې کې د هغوی هم ګټه ده. کله چې سېلابونه راشي، پاکستان ته درانه زیانونه اړوي. بله خبره دا ده چې دا اوبه راګرځي نه، بلکې د برېښنا له تولید وروسته بېرته سیند ته توییږي. موږ هم دې بند ته ډېره تلوسه لرو او خدای د وکړي چې په خپل ژوند کې یې ووینو.»
منصور دغه راز وايي، که څه هم د دې بند د جوړېدو ټولیز لګښت څرګند نه دی، خو د تمويل لپاره یې مالي ملاتړ ته اړتیا نه شته او هڅه کېږي چې له خپلو داخلي سرچینونو په استفادې د کونړ پر سینديزې حوزې سربېره د ټولو حوزو اوبه مهار کړي.
په ورته مهال، د اقتصادي چارو شنونکي د کونړ پر سيند بند جوړل حياتي پروژه او د اوبو د ښه مدیریت او مهار لپاره اړینه بولي.
دوي وايي، د کونړ سیند اوبه مهار د ټولو افغانانو یوه لویه هیله ده او سرپرست حکومت باید ورته جدي پاملرنه وکړي.
د اقتصادې چارو شنونکی محمد یونس ځدراڼ وايي: « پر کونړ سیند باندې د بند جوړول او د دې پروژې پيل د افغانستان د برېښنا تولید،کرنې، اقتصاد او بېکارۍ کچې کمولو په برخه کې ډېر ستر رول لري. دا د افغانستان د خلکو لوی آرمان دی چې کارونه یې پیل شي.»
د کونړ پر سیند د اوبو او برېښنا بند جوړښت ستره پروژه ده چې سرته رسېدو سره به یې په زرګونه هکټاره شاړه ځمکه خړوبه او ګڼو ولایتونو ته به برېښنا ورکړي او له دې سره به د افغانستان اوبه چې له کلونو راهیسې پاکستان ته وړیا روانې دي، مهار شي او زیاته اندازه برېښنا ترې تولید شي.
