بدخشان ولایت کې د یوه خیریه بنسټ په همکارۍ په لومړي ځل د هغو ۲۲ جوړو د ډله ییز واده مراسم ترسره شول چې د اقتصادي ستونزو له کبله یې نه شو کولی په خپل شخصي لګښت د واده مراسم ترسره کړي.
د دې مراسمو ترسره کوونکي وايي، مراسمو ته یې د بدخشان له ۲۸ ولسوالیو یاد شمېر جوړې انتخاب کړې چې اصلي موخه ترې د اسلامي کلتور دود کول او د لوړو مالي لګښتونو مخنیوی دی.
د مراسمو تنظیموونکی احمد جواد فروغ وايي: « زموږ د دې مراسمو زومان او ناوې ګانې د بدخشان له ۲۸ ولسوالیو دي. د ډله ییز واده په دې مراسمو له ۲ میلیونه ۲۰۰ زرو ډېرې افغانۍ لګښت راغلی چې نورو ودونو ته په کتو لږ دی، خو د ګڼو کسانو د ګډ ژوند پیلولو مراسم پرې نیول شوي دي.»
د مراسمو تنظیموونکی آغامحمد شهراني وايي: « دا ډېر د خوښۍ ځای دی چې په دې ډول مراسمو کې ګډون کوم. زه له انجنیر شبیر احمد احمدي او محترم عبدالهادي ډېره مننه کوم چې له هغو کسانو سره د ګډ ژوند په پيلولو کې مرسته کوي چې له کوژدن کېدو یې کلونه اوښتي، خو د لوړ لګښت له امله واده نه شي کولی. زه له نورو سوداګرو او شتمنو کسانو هم غواړم چې ورته ګامونه پورته کړي.»
د مراسمو ګډونوال له دې اقدام د خوښۍ ترڅنګ وايي، د ورته مراسمو ترتیبول کولی شي په ټولنو کې د اسلامي کلتور په دودولو کې رغنده رول ولوبوي او له لوړو مالي لګښتونو مخنیوی وکړي.
د مراسمو ګډونوال صدیق الله شاه وايي: « په دې ډله ییز واده کې هڅه شوې چې لګښتونه کم شي، د واده مراسم په ساده بڼه ونیول شي. زه له ټولو شتمنو کسانو غوښتنه کوم چې په دې ډول مراسمو کې ونډه واخلي او د خپلو ځوانانو لاسنیوی وکړي.»
د بدخشان اوسېدونکي وايي، د ورته ګامونو اخیستل په ټولنه کې د یووالي او خوښۍ سبب ګرځي.
دوی له پانګوالو او سوداګرو غواړي چې له ورته ځوانانو سره دې د هغوی د واده په ترسره کولو کې مرسته وکړي.
د بدخشان اوسېدونکی عبدالعنان وايي: « که د دې خیریه بنسټ په څېر نور سوداګر او شتمن کسان هم ورته پروګرامونه جوړ کړي، دا به ډېر ښه شي.»
د بدخشان اوسېدونکی عبدالحسین وايي: « نکاح یو سنت امر دی، خو زموږ اکثریت ځوانان بېوزله دي او نه شي کولی د لوړو لګښتونو له امله ګډ ژوند تشکیل کړي. باید د انجنیر شبیر احمد په څېر زموږ نور سوداګر هم هېمت وکړي او دغه شان مراسم ونیسي.»
دا په داسې حال کې ده چې د اسلامي امارت رهبر د فرمان له مخې، په ودونو کې پر لوړ لګښتونو بندیز لګېدلی؛ هغه ګام چې کولی شي د ډله ییزو ودونو دود عام کړي او د خنډونو په له منځه وړولو سره، ځوانانو ته د اسانه واده کولو زمینه برابره کړي.
