د سترګو او غوږنو معلولیت لرونکو (ړندو او کڼو) له روزنیزو مرکزونو د ملي موسسو ملاتړ په ناسته کې چې ګڼ شمېر یاد معلولیت لرونکو کسانو هم په کې ګډون کړی و، د تخنیکي او مسلکي زده کړو ادارې چارواکو وویل، هغو کسانو ته د هېواد په ۱۸ ولایتونو کې د ځانګړو زده کړو ۲۰ مرکزونه جوړ شوي چې په سترګو نه ویني او په غوږونو کاڼه دي.
د دوی په خبره، په دغو مرکزونو کې ګڼ شمېر د یاد معلولیت لرونکي کسان تر د ځانګړو زده کړو لاندې دي.
د تخنیکي او مسلکي زده کړو ادارې د ځانګړو زده کړو آمر غلام سخي وحدت وايي: « دا د وطن د دغو اولادونو حق دی؛ لکه څرنګه چې روغ کسان د ښوونځیو، پوهنتونو، روغتونونو او خدماتو حق لري، دغو کسانو ته به هم پاملرنه وشي. لکه څرنګه چې وویل شول، په ۱۸ ولایتونو کې د دغو کسانو لپاره ۲۰ مرکزونه لرو.»
چارواکي دغه راز وايي، پلان لري چې په روان کال کې د سترګو او غوږونو اړوند معلولیت لرونکو کسانو لپاره په ټول هېواد کې ۸ نور د ځانګړ زده کړو مرکزونه هم جوړ شي.
د دې ادارې د کیفیت د تضمین رییس وايي، په ۳۴ ولایتونو کې به د ځانګړو زده کړو مراکز جوړ کړي او د اړتیا په صورت کې به په ځینو ولایتونو کې د دغو مرکزونو شمېر له ۱ تر ۳ پورې وي.
د تخنیکي او مسلکي زده کړو ادارې د کیفیت د تضمین رییس مبشرآغا وايي: « زموږ عزم دا دی چې په ۸ ولایتونو کې نور مرکزونه هم ایجاد شي. موږ غواړو لږترلږه په هر ولایت کې یو مرکز حتمن ولرو؛ خو په هغو ولایتونو کې چې اړتیا ډېره وي، اړتیا ته په کتو به ډېر مرکزونه جوړ شي؛ ترڅو ناشنوایانو او نا بینایانو ته د دوی د اړتیا وړ خدمتونه وړاندې کړي. دوی ته به تعلیم، وسایل او کار ورکړل شي.»
د چارواکو په خبره، هغه نابینایان او ناشنوایان چې خپلې زده کړې بشپړوي، په حکومتي اداراتو کې به ورته د کار زمینه برابره شي او په دې برخه کې ټولو حکومتي ادارو ژمنه هم ورسره کړې.
