دې وروستيو کې کابل ته د پاکستاني چارواکو له سفرونو سره د ادعاوو پر ځای د دواړو لوريو تمرکز د همکاريو پر زياتېدو و.
خو د پاکستان لومړي وزیر مرستیال او د بهرنيو چارو وزير ژر بېرته پر افغانستان له ادعاوو سره د خپلې تګلارې چوپتيا ماته کړه.
اسحاق ډار د دې ترڅنګ چې باثباته افغانستان يې د پاکستان د ګټو لپاره حياتي بللی ويلي، د افغانستان له خاورې پاکستان ته متوجې خطر يو حقيقت دی.
نوموړي په اتلانتيک شورا کې چې واشنګټن کې ده ويلي، کابل ته يې د سفر پرمهال د سرپرست حکومت له چارواکو پر شريکو مسايلو ډېر بحثونه کړي او د يادو بحثونو په پایله کې يې له خپل لوري کړې ژمنې هم عملي کړي دي.
هغه زیاته کړې:« باثباته افغانستان زموږ په حياتي ګټو کې شامل دی. موږ سوله ييز، ټولشموله او د خپلواک افغانستان غوښتونکي يوو. په هر حال، د افغانستان له خاورې د پاکستان امنيت ته د ترهګرۍ خطر واقعي دی. د روان کال د اپریل پر ۱۹مه د دواړو هېوادونو ترمنځ پر بنبست سربېره مې د يوې ورځې لپاره افغانستان ته سفر وکړ. موږ پر سياست بحث وکړ، پر سوداګرۍ، اقتصاد او کډوالو مو بحث درلود او تر لمر لاندې مو په هر څه بحث وکړ او له ليدنې وروسته مو شوې پرېکړې علني کړې. دواړو ملتونو په ژوندۍ بڼه اورېدې. دا مهمه ده څو وپوهېږئ، هغه څه چې ما يې د اپریل پر ۱۹مه ژمنه کړې، ټولې عملي شوي. کوم چې موږ د اعتبار جوړولو او د جولای پر ۷مه د افغان ټرانس پروژې لاسليک کولو ته سوق کوي.»
سرپرست حکومت د اسحاق ډار تازه څرګندونو په اړه څه نه وايي، خو له دې وړاندې يې د یاد هېواد دا ډول تورونه په کلکه رد کړي.
بلخوا د سیاسي چارو شنونکي وايي، افغانستان دومره امکانات نه لري چې نيابتي ډلې جوړې او پاکستان ته يې د جګړې لپاره واستوي.
دوی برعکس پاکستان تورنوي چې هم ترهګري روزي او هم يې له امله افغانستان ته د پړې ګوته نيسي.
د سیاسي چارو شنونکی محمداسماعیل ځدراڼ وايي:« په افغانستان کې دومره زور چېرته شته دی چې له دې ځایه دوی دومره اکمالات ورته وکړي، د افغانستان دولت دومره بودیجه کله لري چې دوی سره دا مرسته وکړي. درېیمه خبره دا ده چې په کوردننه په کې زیاتې ستونزې دي، هلته ټيټيپي راپورته شوې، بلوڅ راپورته شوې، پر دوی باندې هلته ظلمونه شوې دي.»
ځینې نور بیا وايي، سرپرست حکومت دې د پاکستان پر وړاندې خپل دريځ قاطع کړي او د هر عمل پر وړاندې دې يې عکسالعمل وښيي.
دوی د پاکستان تر کنټرول لاندې سيمو کې د ناامنيو لامل د پاکستان د پوځ هغه اعمال او چلن يادوي چې په قبايلو کې يې له خلکو سره جاري ساتلي.
د سیاسي چارو شنونکی شهسوار سنګروال وايي:« د تاریخ په اوږدو کې پاکستان کله هم له افغانستان سره د دوستۍ لپاره کوم ښه نیت نه درلود، تل یې په هر ستېج کې، د ملګرو ملتونو له ستېج راواخله، تر امریکا، مونیخ او بیا د شانګهای تر ناستو پورې پاکستان تل دغه تور پر افغانستان پورې کړی چې په افغانستان کې تروریستان دي او پاکستان او یا سیمه ګواښي. »
د شنونکو په باور اسلام اباد د افغانستان چارواکو سره یو ډول او په نړیوالو سټېجونو بیا د افغانستان بل ډول تصویر وړاندي کوي.
له دې وړاندې پاکستاني چارواکو ورته ادعاوې کړې، خو اثبات لپاره يې هېڅ ډول ثبوت نه دی وړاندې کړی.
