په بلخ ولایت کې د صنتعکارانو یوه له هغو ستونزو چې له امله یې د کارخونو فعالیتونه له خنډ سره مخ دي، د شادیان صنعتي پارک ته غځیدلې خامه لار ده.
تازه د مزارشریف ښاروالۍ له لوري د دې صنعتي پارک د غځېدلې لارې اسفالټ اچونه پیل شوه.
د ښاروالۍ مسوولین وايي، ډاډ ورکوي چې تر دې وروسته به دې ته ورته نورې پروژې هم تر کار لاندې ونیسي.
د مزار ښاروالۍ ویاند مصطفی محمدي وايي: « په ۱۴۰۲ کال کې د لومړي فاز قیراچونې چارې بشپړې شوې او دا دی په ۱۴۰۳ کال کې یې د درېیم فاز قیراچونې چارې پیل شوې او دا مهال یې ۸۵ سلنه چارې مخته تللې دي.»
د دې سړکونو د جوړوونکي قراردادي شرکت مسوول مصطفی ضیایي وايي: « دا پروژه چې ښاروالۍ یې له موږ د کیفیت او ښه تطبیق غوښتنه کړې، پر هماغه معیار روان یو او د کیفیت له اړخه هېوادوالو ته ډاډ ورکوو.»
په همدې حال کې، بلخي صنعتکاران د دې ولایت نورو صنعتي پارکونو ته د غځېدلو لارو رغونه هم اړینه بولي.
صنعتکار غلام سخي قرباني وايي: « موږ د اسلامي امارت له مسوولینو غواړو چې امیرعلي شیرنوایي صنعتي پارک ته لویه غځېدلې لار هم ورغوي. موږ ته دې حکومت ځانګړې پاملرنه وکړي، ترڅو په ډاډه زړه پانګونه وکړو.»
صنعت کار محمد اسماعیل ملا زاده وايي: « امیرعلي شیر نوايي پارک ته غځېدلې لاره خو تاسو مشاهده کړه چې د ژمي پرمهال د موټرو تګ راتګ پرې په خورا ستونزو ترسره کېږي. کانالیزاسیون چې په هر صنعتي پارک کې یو مهم اصل دی، خو که چېرې نه وي، نو ګڼې ستونزې را ولاړوي. زموږغوښتنه داده چې دغې برخې ته پام وشي.»
په ورته مهال، د بلخ کانونو او صنایعو ریاست چارواکي هم ډاډ ورکوي چې د صنعتکارانو د ستونزو د حل لپاره هڅې کوي.
د بلخ ولایت د کانونو او صنایعو رییس امام الدین ثنایي زاده وايي: « تاسو ته بهتره مالومه ده چې شادیان صنعتي پارک ته غځېدلې لاره باندې کار روان دی چې زیاته برخه سړک، پلونه او ګلدانونه یې جوړ شوي دي. د امیرعلي شیرنوايي پارک ته غځېدلې لارې جوړېدو په اړه مو له مزار ښاروالۍ سره خبرې شوې چې د دوی له خوا ډاډ را کړل شوی. ښايي راتلوونکی کال یې بودیجه کې شامل کړي.»
بلخ ولایت کې امیرعلي شیرنوايي، بلخ باستان او شادیان هغه لوی صنعتي پارکونه دي چې دا مهال په کې شاوخوا ۱ زر ۷۰۰ لویې او کوچنۍ کارخونې فعالیت کوي.
