تېر کلونو کې د ګڼې ګوڼې زياتوالي له امله د پاسپورټ ترلاسه کول سخت کار و، خو اوس د پاسپورټ رياست مسوولین وايي، د پاسپورټ ترلاسه کولو لپاره د متقاضيانو شمېر څو برابره کم شوی.
دوی د غوښتونکو د شمېر کموالي لامل په تېر کې خلکو ته په زياته پيمانه د پاسپورټ وېشنه ګڼي او دغه راز زياتوي چې اوس مهال ځکه خلک د پاسپورټ اخيستلو لپاره په بېړه اقدام نه کوي چې د ترلاسه کولو په اسانېدو سره يې ژر ترلاسه کولی شي.
د پاسپورټ ریاست ویاند قاري عمري لوګری وايي: « د پاسپورټ لوی ریاست په تېرو درېیو ماشتو کې ۲۶۲ زره پاسپورټونه هېوادوالو ته وېشلي دي. په دې پاسپورټونو کې ورک شوي، سوځېدلي او نوي پاسپورټونه شامل دي.»
نوموړی زیاتوي، تېرو درېيو مياشتو کې شاوخوا ۳۰۰ زره پاسپورټونه خلکو ته وېشل شوي او په ورځني ډول ۵ زره ټوکه پاسپورټونه وېشل کېږي.
د ده په خبره، د لا زياتو اسانتياوو په موخه په پاسپورټ کې د عمر او نوم اصلاح لپاره د برېښنايي تذکرو سيسټم د پاسپورټ له سيسټم سره نښلول شوی.
د پاسپورټ ریاست ویاند په دې اړه وايي: « د تېر په پرتله د پاسپورټونو د وېش مقدار تر ټولو ټیټې کچې ته راغلی. هېوادوال کولی شي په نورمال شکل راشي او پاسپورټ ترلاسه کړي. په تېرو کالو کې موږ هره ورځ تر ۱۰ زره ټوکه پاسپورټونه وېشل، خو اوس د ټول هېواد په کچه په ورځني ډول له ۴ تر ۵ زرو پاسپورټونه وېشل کېږي. همدارنګه د وېزو وېش هم د پاسپورټ ریاست پر غاړه دی او په تېرو دوو میاشتو کې بهرنیو وګړو ته تر ۲۶۰۰ وېزې وېشل شوې دي چې په کې سیاحتي او کاري وېزې شاملې دي.»
د پاسپورټ رياست د مالوماتو له مخې، تېرو دوو میاشتو کې بهرنيو وګړو ته نږدې ۳ زره وېزې هم ورکړل شوې او دا پروسه يې اسانه کړې ده.
له دې سره هم مهاله، د پاسپورټ غوښتونکي د پاسپورټ ترلاسه کولو کې له رامنځته شویو اسانتیاوو خوښ دي او د لا ډېرو اسانتياوو غوښتنه کوي.
د پاسپورټ غوښتونکی کفایت الله وايي: « مخکې ستونزې وې، خو اوس هرڅه سم دي او پروسه په ډېره ښه توګه روانه ده. کله چې د پاسپورټ غوښتنه وکړې او وخت ته درته تعیین کړي، په هماغه ټاکل شوي وخت پاسپورټ درکوي.»
د پاسپورټ غوښتونکی عبدالوکیل وايي: « پخوا به په شپو شپو تکلیفونه تېرېدل او ډېر وخت ته اړتیا وه، خو اوس کولی شو په یوه ساعت کې د خپل پاسپورټ قانوني پړاوونه طی کړو او پاسپورټ ترلاسه کړو.»
د پاسپورټ رياست مالومات ښيي چې تېر لمریز کال کې له دوه میلیونو او۲۰۰ زرو زیات پاسپورټونه هېوادوالو ته وېشل شوي دي او په دې موده کې د پاسپورټونو وېش له لارې، څه باندې ۱۳ میلیارده افغانۍ عواید هم راټول شوي دي.
