وروسته له هغې چې روسیې د افغانستان اسلامي امارت د رسمیت پیژندنې اعلان وکړ، اوس اسلامي امارت وايي، له امریکا سره یې د خبرو اترو لپاره دروازې پرانیستې دي او هر وخت د خبرو او مذاکراتو زمینه ورته برابره ده.
د اسلامي امارت مرستیال ویاند حمد الله فطرت وايي، سرپرست حکومت له امریکا سره په تماس کې دی او دغه اړیکې په دوحه کې د افغانستان د سفارت او سیاسي دفتر له لارې تنظیمېږي.
فطرت په دې اړه وايي: « له امریکا سره هم زموږ د خبرو او ډیالوګ چینل خلاص دی. په دوحه کې د افغانستان اسلامي امارت سفارت او سیاسي دفتر هغه چینلونه دي چې له لارې یې موږ وخت ناوخت له امریکا سره اړیکې لرو.»
حمد الله فطرت له شمشاد سره په مرکه کې د نورو هېوادونو ترڅنګ له امریکا هم غوښتي چې له اسلامي امارت سره دې رسمي تعامل ته را وړاندې شي.
فطرت زیاته کړې، امریکا دې اسلامي امارت پر رسمیت وپېژني او دغسې پرېکړې نه یوازې دا چې د دواړو هېوادونو بلکې د ټولو په ګټه دي.
هغه زیاته کړې:« د امریکا په ګډون پر ټولو هېوادونو غږ کوو چې د افغانستان له اسلامي امارت سره رسمي تعاملاتو ته را مخکې شي، اسلامي امارت پر رسمیت وپېژني. دا ډول پرېکړې د دواړو هېوادونو بلکې د ټولو هېوادونو پر ګټه دي.»
له بلې خوا، د سیاسي چارو کارپوهان وايي، دې کې شک نه شته دی چې اسلامي امارت له نړیوالې ټولنې او په تېره بیا له امریکا سره د خبرو لپاره دروازې خلاصې پرې اېښې دي، خو د رسمیت پېژندنې په برخه کې نړیوال خپل ځانګړي شرایط لري.
د سیاسي چارو شنونکی معین ګل څمکنی وايي: « دا چې اسلامي امارت په دوحه کې رسمي سفیر لري، د هغه په واسطې سره له ټولې شرقي او غربي نړۍ سره خبرې اترې کوي او د مذاکراتو دروازه یې تل پرانیستې ساتلې ده، خو د نړیوالو غوښتنې هم واضېح دي. هغوی د بشري حقونو مساله یادوي، دوی د ښځو او نجونو پر وړاندې د ښوونځیو او پوهنتونونو دروازې خلاصول، همدارنګه ښځو ته د اسلام او افغاني عرف په رڼا کې اجازه ورکول شامل دي.»
د افغانستان سرپرست حکومت ډاډ ورکوي چې د خپل متوازن، بې پرې او اقتصاد محوره بهرني سیاست پر بنسټ هېڅ هېواد ته به پر بل هېواد ترجېح نه ورکوي، له ټولو سره ښې او پر متقابل درناوي ولاړې اړیکې غواړي.
د چارواکو په خبره، د روسیې له لوري د اسلامي امارت رسمیت پېژندنه ټولو هېوادونو ته مثبت پیغام لري او له همدې امله دې نور هېوادونه هم د خپلو ګټو پر بنسټ له اسلامي امارت سره رسمي اړیکې ټینګې کړي.
