په هرات ولایت کې د محرم میاشتې۱۰ مې په مناسبت د ځوانانو لخوا د وینې ورکولو کمپاین ترسره شو.
مسوولین د یاد کمپاین موخه ټولنه کې د وینې ورکولو دود راژوندي کول یادوي او زیاتوي چې دې کمپاین کې به څه باندې ۴۰۰ کسان وینه ورکړي.
د کمپاین مسوول محمد رفیق شیرزی وايي:« د دې کمپاین موخه د ویني راټولو او د هرات حوزوي روغتون ویني بانک کې وینې زیاتوالی او اړمنو ته ویني ورکول دي. تاسو ټول پوهیږئ وینه هغه ماده ده چې بازار او مارکېټ کې نه پلورل کیږي. د اړمنو کسانو لپاره حیاتي ماده ده چې د دونرانو لخوا ورسره مرسته کیږي.«
دا کمپاین داسې مهال ترسره کېږي چې د یادې برخې مسوولین دې ولایت کې د وینې بانک برخه کې له کمښت سره مخ دي.
د هرات ویني بانک مسوولین هم وایي، حوزوي روغتون کې د وینې ذخیره له ۶۰۰ پاکټونو څ ۲۵۰ هغو ته راکمه شوې.
د هرات د وینې بانک امر حامد عمري په دې اړه وايي:« د وینې مصرف خو اوس بېخي زیات دی. موږ د هرات حوزوي روغتون کې روزمره ۱۷۰ تر ۱۸۰ پاکټه وینه توزیع لرو چې په کې آر.بي.سي، بلد رید، بیست بلد او پلازما دا ټول موجود دي.»
په همدې حال د هرات اوسېدونکي د وینې ورکولو دود بیا راژوندي کولو او وینې ورکولو سره د اړمنو لاسنیوي لپاره دا ډول کمپاینونو ترسره کولو هرکلی کوي او له نورو اوسېدونکو هم غواړي چې د وینې ورکولو سره ژوند وژغوري.
د هرات یو تن اوسېدونکی فیروز احمد وايي:« د انسان دوستۍ، ایماني او وجداني رسالت چې موږ یې لرو، د بشریت ژغورلو او څوک چې وینې ته اړتیا لري چون تاسو پوهیږئ وینه هغه ماده ده چې بازار سوپر مارکټونو کې نه پلورل کیږي دا همکارۍ باید په ټولنه کې زیاتې شي.»
سره له دې چې دا کمپاین په رضاکارنه توګه ترسره شو، خو روغتیا پالان د وینې ورکړې برخه کې سپارښتنه کوي چې سالم انسانان د خپلې وینې او روغتیا لپاره باید په کال کې یو ځل نورو ته وینه ورکړي.
