د روسیې بهرنیو چارو وزارت له لوري د افغانستان اسلامي امارت له رسمیت پېژندنې وروسته، چین د مسکو له دې اقدام هرکلی کړی او له نړیوالې ټولنې سره يې د افغانستان پیوستون اړین بللی دی.
د دې هېواد بهرنیو چارو وزارت مسوولین وايي، بېجېنګ د کابل او نړیوالې ټولنې ترمنځ د تعامل پراخېدو ملاتړ کوي.
دوی زیاتوي، چین له افغانستان سره خپلې ډیپلوماټیکې اړیکې هېڅکله نه دي پرې کړې او تل یې د متقابل درناوي پر بنسټ دوام ورکړی.
د چین بهرنیو چارو وزارت ویانده ماونینګ په دې اړه وايي:« چین د افغانستان او روسیې ترمنځ د نوي پرمختګ هرکلی کوي. افغانستان باید له نړیوالې ټولنې جلا پاتې نه شي. موږ د افغانستان سرپرست حکومت او نړیوالې ټولنې ترمنځ د تعاملاتو د پراخېدو ملاتړ کوو. موږ د افغانستان بیا رغونې، ترهګرۍ ضد مبارزې او سیمهيیز ثبات لپاره ملاتړ کوو. چین له افغانستان سره د سرپرست حکومت له رامنځته کېدو سره سم هېڅکله خپلې ډېپلوماتیکې اړیکې نه دي پرېکړې او د متقابل درناوي پر بنسټ یې دوام ورکړی.»
د روسیې له لوري د افغانستان اسلامي امارت رسمیت پېژندنې په اړه له چین پرته لا تر اوسه کوم هېواد او نړیوال سازمان غبرګون نه دی ښودلی،خو د يو شمېر هېوادونو او سرپرست حکومت ترمنځ ډیپلوماتیکې اړیکې دوام لري.
د سیاسي چارو شنونکي د مسکو له لوري د افغانستان اسلامي امارت رسمیت پېژندنې اقدام ته په غبرګون کې وايي، په سیمه کې د روسیې په څېر د زبر ځواک هېواد له لوري دغه پرېکړه به نورو هېوادونو ته هم دا انګېزه ورکړي څو له اسلامي امارت سره رسمي اړیکې ورغوي.
د سیاسي چارو شنونکی توریالی ځاځی وايي:« د روسیې له لوري د افغانستان اسلامي امارت رسمیت پېژنده ناڅاپي نه وه، حتما روسیې له خپلو متحدینو هېوادونو سره، د بیلګې په ډول له چین سره په دې اړه خبرې کړې. دا چې اوس چین د دې رسمیت پېژندنې ملاتړ کړی، زه باوري یم چې چین به هم ډېر ژر افغانستان پر رسمیت وپېژني.»
روسيې له نږدې څلور کلن ځنډ وروسته د اسلامي امارت پر رسميت وپېژاند. په کابل کې د روسيې شارژدافېر ټینګار کړی چې هېواد يې دا پرېکړه له افغانستان سره د اړیکو او دوه اړخیزو همکاریو پر بنسټ کړې.
