د بلخ ولایت په مزار هوټل سوداګریز مرکز کې د زونونو پر کچه د بهرنیو اسعارو د لیلام، کنټرول، د تورو پیسو استعمال او قاچاق د مخنیوي لپاره لومړی رسمي او معیاري مرکز پرانیستل شو.
مسوولین د یاد بازار د پرانیستې موخه د اسعارو بازار شفافیت، د لیلام بهیر روڼتیا او د افغانیو ارزښتمند ثبات ته زمینه برابرول بولي.
بلخ کې د افغانستان بانک آمر مولوي ضياالرحمن مدني وايي:« هغه اصول چې د اافغانستان بانک لخوا دوی ته تشریح کېږي هغوی باید د هغې مطابق دغه بولۍ مخته یوسي او په دې بولۍ کې هغه صرافان چې جوازونه لري، کولی فعاله ونډه ولري.»
د مزار هوټل سوداګریز مارکيټ مسوول عصمت الله اسحق زی وايي:« وروسته له دې موږ لخیره کولای شو چې د پیسو احتکاراتو مخنیوی وکړو او هغه پیسې چې د شومو اهدافو لپاره کارول کېږي مخنیوی یې وشي او بل دا چې یو نظم رامنځته شي تر څو راتلونکې کې هم د احتکار مخه ونیول شي.»
د بلخ صرافان د دغه مرکز پرانیسته د بازار د کنټرول او د صرافانو ترمنځ یې د سیالۍ رامنځته کېدو لپاره مهم ګام بولي.
صراف یعقوب وايي:« موږ تاسو ته ډاډ درکوو چې دا هغه بازار دی چې بې جوازه څوک په کې فعالیت نشي کولی. انشاالله موږ باور لرو چې دغه بازار پرانیستې سره به د خپل سري معاملو مخنیوی وشي پخوا به چې چا پیسې زیاتې لرلې، د بازار نظم به یې اخلال کاوه.»
یو بل صراف ثمرالدین بیا وايي:« سل په سلو کې دغه بولۍ زموږ ټولو پرګټه ده، ځکه پخوا هر څوک په خپل سر ول، خو اوس به ټولې صرافۍ یو ځای په منظم ډول فعالیت کوي.»
دغه راز ورته مهال بلخي چارواکي هم د یاد ګام ستاینه کوي او دې برخه کې له خپلو هر راز همکاریو ډاډ ورکوي
د بلخ ولایت مقام مرستیال نورلهادي ابو ادریس وايي:« د داسې کسانو ملاتړ د دولت مسوولیت دی، باید پوره ملاتړ یې وکړي څو هېواد له هر اړخه ځان بسیاینې ته ورسېږي.»
بلخ کې مزار هوټل د هېواد پر کچه یو له لویو سوداګریزو مرکزونو دی چې تر دې وړاندې په کې د غلو دانو او نفتو توکو بولۍ فعاله وې.
