د بلخ ولایت امنیتي چارواکي وايي، د تېر کال له پیل راهیسې یې د نشه يي توکو د کاروبار په توګه په ۳۸۰ قضیو کې شاوخوا ۶۰۰ تنه نیولي دي.
د دغه ولایت امنیې قوماندانۍ د نشه یي توکو پر وړاندې د مبارزې مدیریت مسوولین وایي، په دې موده کې له نیول شویو مظنونینو سره، سلګونه بېلابېل ډوله نشه یي توکي او دغه راز الکولي مشروبات ترلاسه او له منځه وړل شوي دي.
د بلخ امنيې قوماندانۍ کې د نشه يي توکو پر وړاندې مبارزې مدیرعزت الله سباوون وايي: « د تېر کال راهیسې تر اوسه پورې، په ۳۸۳ قضیو کې ۵۹۶ مظنیونین د نشه یي توکو د قاچاق او پېر او پلور په تور نیول شوي دي. له دوی سره ۷۶۱ بېلابېل ډوله نشه یي توکي او څه باندې ۵۴۲ لېټره الکولي مشروبات نیول شوي دي.»
مسوولين همداراز وایي، پر نشه یي توکو د څه باندې ۲ زره ۱۰۰ تنو روږدو کسانو درملنه شوې او دا مهال شاوخوا ۷۷۰ نور روږدي کسان تر درملنې لاندې دي.
عزت الله سباوون په دې اړه وايي: « هغه معتادین چې په سړکونو او چوکونو کې به پراته وو او د خلکو د مزاحمت او اذیت لامل به ګرځېدل، ټولټال ۳ زره ۳۰ کسان راټول شوي چې له ډلې یې ۲ زره ۱۲۱ تنو درملنه شوې او اوسمهال د ۷۷۰ کسانو درملنه روانه ده.»
په ورته مهال، له نشه يي توکو سره د مبارزې مدیریت اړوند د معتادینو درملنې مرکز مسوولین بیا د متعادينو د رغېدنې او ورته له چمتو شویو امکاناتو خبر ورکوي.
دوی پر ځوانانو هم غږ کوي چې له دې ناوړه عمل لاس په سر شي.
د بلخ د معتادینو درملنې مرکز مسوول مدیر محمد عظیم حکیمي وايي: « ټول هغه امکانات چې دلته چمتو دي، استادان خپل تدریس کوي او همداراز روانشناسان ناروغانو ته د مخدره توکو څخه د خلاصون په اړه انګېزه ورکوي. اسلامي درسونه هم دغه مرکز کې جریان لري، کوم کسان چې د دې مرکز له درملنې وروسته کورونو ته ځي، موږ ورته دا توصیه کوو چې بیا ځلې دې دغه ناوړه عمل باندې لاس نه پورې کوي، بلکې خپلې کورنۍ او ټولنې ته دي خدمت وکړي.»
بله خوا، یو شمېر له نشه یي توکو رغېدلي کسان وايي، د سالم صحت په لرلو سره له نوي ژوند برخمن شوي او له اسلامي امارت او مرستندویه بنسټونو غواړي چې دوی ته کاري فرصتونه برابر کړي.
د نشه يي توکو له کارولو روغ شوی بصیر وايي: « موږ له اسلامي امارت ډېر خوشاله یو چې دلته یې درملنې ته راوستلي یو او تداوي کېږو. اوس زیات د خوښۍ احساس کوو چې له نشو ژغورل شوي یو او نوی ژوند مو پیل کړی. موږ غواړو چې کاري فرصتونه راته برابر شي.»
د نشه يي توکو له کارونې روغ شوی محمد سلیم وايي:« زه ډېر خوشاله یم چې روغ شوی یم. دا نشې له بې کارۍ پیدا کېږي او د انسان ژوند خرابوي. موږ له حکومته غواړو چې موږ ته دې یو کار پیدا کړي؛ ترڅو مصروفیت ولرو او خپل نوی ژوند جوړ کړو.»
د بلخ امنیې قوماندانۍ د مالوماتو له مخې، په تېر څه باندې یوه کال کې شاوخوا ۱۲۰۰ نارینه، ښځینه او ماشومان سوالګرهم د ښار له واټونو راټول شوي او د هغوی لومړنیو اړتیاوو ته رسېدنه شوې.
