د کندهار ولایت سيمه ییز مسوولين وایي، د روان ۲۰۲۵ کال د اپریل میاشتې له لومړۍ نېټې راهیسي د سپین بولدک له لارې ۱۱ زره او ۴۰۰ کورنۍ چې د وګړو شمیر يي ۵۰ زره کیږي، هیواد ته راستنې شوې دي.
دوی زیاتوي، په دې موده کې پاکستان کې زنداني شوي ۴ زر ه ۵۰۰ بندیان هم هېواد ته راستانه شوې دي.
د دوی په خبره راستانه شویو کډوالو ته له رسېدو سره سم د خوړو، درملو، اوسېدو ځای، څښاک پاکو اوبو مرستو سربېره، نقدي مرستې، سرپنا او د کور د اړتیا وړ توکو او اصلي مېنو ته د ستنولو برخو کې اسانتیاوي برابرې شوې.
تخته پل ولسوالۍ کې د انځرګي پنډغالي کې د کډوالو امریت د ثبت مدیر عبدالطیف حکیمي وايي:« له کوم وخت راهیسي چې پاکستان د دویم ځل لپاره د مهاجرینو اجباري ایستل راشروع کړل، نو د اپریل د لومړۍ نیټې بیا تر نن ورځې پوري ۱۱ زره ۴۰۰ کورنیو پورې راغلي دي، چې د دوی مجموعي ارقام د ۵۰ زرو په شاوخوا کې راځي.»
راستانه شوي کډوال وایي، د پاکستان امنیتي ځواکونو يې پر کورونو چاپې وهلې، قيمتي توکې او پیسې یې ترې اخستلې او زنداني کول يې.
دوی زياتوي، پاکستان د افغان کډوالو د کورنۍ غړي، ښځې او ماشومان نيسي او افغانستان ته يې پر زور ستنوي.
له پاکستانه راستون شوی افغان کډوال خان محمد وايي:« د شپي په کورونو چاپې وهل کیدې، نیسي يي پیسي درڅخه اخلي.»
له پاکستانه یو بل راستون شوی افغان کډوال سمیع الله بیا په دې اړه داسې وايي:« دوی دغه فشار پر افغانانو راوړی، په افغانستان کې زموږ دغه غوښتنه ده چې دلېته ځمکي مهاجرو ته ورکړي، د ډېرې ستړیا سره مخ دي.»
پاکستان د ۲۰۲۵ کال د اپریل پر لومړۍ نېټه له پاکستانه د افغان کډوالو د جبري ايستنې بهیر پېل کړ، چې دغه بهير پر نړيواله کچه له توندو نيوکو او غبرګونو سره مخ شو.
