د ننګرهار ولایت مرکز جلال اباد اوسېدونکي وايي، له یوې خوا د هوا ګرموالي او له بلې خوا د برېښنا پرچاوۍ له ګڼو ستونزو سره مخ کړې دي.
دوی وايي، د برېښنا بې وخته پرچاوۍ او په عمومي ډول ننګرهار کې د برېښنا کمښت له امله دې شپو او ورځو کې له کړاوه ډک ژوند تیروي.
د ننګرهار اوسېدونکی ایاز وايي:« د شپې یوه بجه، یولس بجې، لس بجې د برق پرچاوي له دغه ولس سره ظلم ده. په دې اړه باید د برېښنا ریاست جدي توجه وکړي ترڅو مشرقي زون او ننګرهار له دغه زجره وژغوري.»
د ننګرهار یو بل اوسېدونکی بیا په دې اړه وايي:« د برېښنا پرچاوي ډېره زیاته شوې. یو ساعت وي، بیا نیم ساعت نه وي د شپې له خوا ډېره زیاته پرچاوي کوي او ګرمي هم سخته زیاته ده او د برېښنا د پرچاوۍ له امله خلک ډېر په عذاب دي.»
ننګرهار او په تېره جلال اباد ښار چې د هېواد له ګرمو ښارونو حسابېږي، اوسېدونکي يې د برېښنا ورکړې سهم د ډېروالي غوښتنه کوي.
د ننګرهار اوسېدونکی بهر ګل وايي:« له ګرمۍ سره ډېر لاس او ګریوان یو. له حکومته مو دا خواهش دی چې موږ ته یا برېښنا سمه کړي او یا ننګرهار ته برېښا زیاته کړي. موږ ته سمه برېښنا راکړئ. د ننګرهار برېښنا ډېره خرابه ده او ټول خلک د ننګرهار له برېښنا ډېر شکایت لري.»
د ننګرهار اوسېدونکی عطا الرحمان وايي:« دا شته برق ډېر ناکافي دی له خلکو سره نه د جنراتور او نه هم د سولرو امکانات وي، نو زموږ غوښته له چارواکو داده چې،دغه د برېښنا لین ډبل شي ترڅو د ولسونو ستونزې کمې شي.»
په همدې حال کې د ننګرهار برېښنا ریاست مسوولین د برېښنا د پرچاوۍ لامل پر عمومي شبکې د بوج زیاتوالی ښيي خو زیاتوي هڅې یې پیل کړي چې د ننګرهار برېښنا ډېره کړي.
د ننګرهار برېښنا رییس جان محمد انقلابي وايي:« دا کوم لین چې له کابله ننګرهار ته راغلی دی، نور ظرفیت نشته، دا یو یو فیډر چې، ګلوو نوبتي پرچاوي چې کومه ده دا د دې له خاطره ده چې هلته لین اضافه بار کیږي، ټول فیډر په یو وخت نه چالانیږي نو د مرکز هدایت دا وي چې، تاسو یو فیډر پرچاو کړئ ترڅو کوم مشکل جوړ نه شي او عمومي لین کې چې څومره برق ننګرهار ته راځي دا له لاسه ورنه کړو. په دې خاطر پرچاوي تطبیقوو بله لار یې موږ سره هم نشته او بله لار یې همدا ده چې هغه دویم لین راشي او په دې باندې هم کار روان دی امید دی چې یو سر ونیسي.»
دا لومړی ځل نه دی چې جلال اباد ښاریان د بریښنا له پرچاوۍ شکایت کوي، بلکې تر دې وړاندې هم ورته شکایتونه شوي او د وخت مسوولینو د یادو ستونزو د حل ډاډ ورکړی، خو دا ځل تمې ځکه ډېري دي چې په ننګرهار او لغمان کې د برېښنا شرکت د لمریزې برېښنا د دوو شبکو چارې پيل کړې چې فعالېدوسره به يې یاده ستونزه حل شي.
