د ملګرو ملتونو امنیت شورا د دوشنبې ورځې ماښامنۍ ناسته کې د افغانستان اوسني وضعیت په اړه د هېوادونو استازو بیا هم د افغان نجونو او ښځو په حقونو، تروریستي خطرونو، سرپرست حکومت سره د نړیوالې ټولنې پر اړیکو او اقتصادي مسایلو بحثونه او خبرې وکړې.
په دې ناسته کې د امریکا استازې ویلي، له افغانستان سره د دې هېواد سیاست د بیا کتنې په حال کې دی او د امریکایي وګړو ساتنه د دوی په لومړیتوبونو کې ځای لري.
هغې په دې اړه ویلي:« پایلو ته د لاسرسي نه شتوالي ته په کتو، د افغانستان په تړاو د امریکا سیاست د بیا کتنې په حال کې دی. نوي حکومت لپاره زموږ د خلکو ساتنه، د تروریستي خطرونو او د ټولو نیول شویو امریکايي وګړو د آزادۍ تضمین، زموږ د اصلي لومړیتوبونو څخه دي. اوس د دې وخت رارسېدلی چې د افغانستان حکومت خپل عمل وښیي.»
په ورته وخت کې د چین استازي له سرپرست حکومت سره د خبرو اترو پر دوام ټینګار کړی او د یو اړخیزو بندیزونو لرې کولو غوښتنه یې کړې.
د چین استازي زیاته کړې:« چین غواړي له سرپرست حکومت سره د خبرو بهیر وساتل شي. د یوناما د موزاییکي ماډل یوناما او د دوحې غونډو ملاتړ سره، شورا باید د ۱۹۸۸ بندیزونه په موقع سره تعدیل کړي. هېوادونه باید د افغانستان کنګل شوې شتمنۍ بېرته ورکړي او یو اړخیز بندیزونه پای ته ورسوي.»
روسیه هم د افغان ولس ملاتړ ته ژمنه پاتې شوې او ویلي یې دي چې بشري ملاتړ باید له سیاسي فشارونو خوندي وي.
په ملګرو ملتونو کې د روسیې استازي ویلي: « د روسیې فډراسیون د افغان ولس د دوامداره او غیرسیاسي ملاتړ پر اړتیا ټینګار کوي. هر ډول فشار یا زورواکي بې ګټې ده.»
د یو شمېر نورو هېوادونو لکه بریټانیا او فرانسې استازو هم د افغانستان د بشري وضعیت په اړه غونډه کې خپلې اندېښنې څرګندې کړې.
په همدې حال کې د سیاسي چارو کارپوهان وایي، دا غونډه او د هېوادونو اعلامیې د افغانستان د رسمي استازي او سرپرست حکومت د استازي د نه شتون له امله، بې پایلې دي.
د سیاسي چارو شنونکی عزیز معارج وايي: « ملګري ملتونه یا د دې سازمان امنیت شورا که یوه داسې اجنډا وړاندې نه کړي چې عملي اړخ ولري، یا دا چې د طالبانو استازي ته ګډون ور نه کړي، ترڅو د دوی پرېکړې تایید یا رد کړي، یا هم دا چې د افغانستان د خلکو واقعي استازی د خلکو له منځه انتخاب کړي، ترڅو هغه حضور ولري؛ له دې پرته د دوی هېڅ ډول پرېکړې اعتبار نه لري.»
ځینې نور بیا باور لري ترهغې چې نړیواله ټولنه او ملګري ملتونه د افغانستان سرپرست حکومت پر رسمیت ونه پېژني او د دې هېواد استازی په رسمي ډول دایمي څوکۍ ته ونه ټاکل شي، روانې ستونزې به پر خپل حال پاتې وي.
د نړیوالو اړیکو شنونکی نجیب الرحمن شمال وايي: « د افغانستان اوسنی وضعیت، امنیتي مسایل، د نړیوالې ټولنې مرستې، د افغان نجونو د حقونو ستونزه او نور مسایل به تر بحث لاندې ونیول شي، همدارنګه د افغانستان د خلکو لپاره د نړیوالې ټولنې د مرستو جذبول به هم یو له مسایلو وي، خو تر ټولو مهمه موضوع به د افغانستان د ښځو د حقونو موضوع وي چې بحثونه به پرې وشي. د یوناما مشره مېرمن اتونبایوا، د ملګرو ملتونو د سرمنشي استازې او د ملګرو ملتونو د ښځو چارو رییسه به خبرې ولري. البته چې د دوی پرېکړې او غوښتنې به بیا هم د سرپرست حکومت له خوا رد شي؛ ځکه دا ناسته د طالبانو د استازي له ګډون پرته جوړېږي، علت یې دا دی چې سرپرست حکومت د ملګرو ملتونو په ګډون د کوم هېواد له خوا پر رسمیت نه دی پېژندل شوی. زه هیله لرم په افغانستان کې د اغېزناک او انتخابي حکومت د جوړېدو لپاره شرایط برابر شي، ترڅو راتلونکو ناستو کې د افغانستان د حکومت استازي ته هم بلنه ورکړل شي.»
د ملګرو ملتونو امنیت شورا په وروستیو کالو کې د افغانستان د وضعیت په اړه ګڼې ناستې کړې دي.
د ۲۰۲۵ د جون ۲۳مه غونډه هم د همدې لړۍ یوه برخه وه چې په کې بشري وضعیت، د ښځو حقونو مسایلو سربیره له نړۍ سره د افغانستان پر تعاملاتو بحثونه ترسره شول.
