د ننګرهار مرکزي زندان له دیني مدرسې او حرفوي زده کړو له مرکز ۱۱۰ تنه طالب العلمان او ۳۴ تنه د حرفوي زده کړو له روزنیزې دورې فارغ شول.
د یادې ادارې مسوولین وايي، فارغ شویو طالب العلمانو د قرانکریم د حفظ، تجوید، ناظرې او له حرفوي زده کړو فارغانو بیا د لمریز برېښنا(سولر) د ترمیم او خیاطۍ په برخه کې زده کړې ترلاسه کړې.
د ننګرهار مرکزي زندان رییس مولوي سهیل سعید وايي: « په حرفوي زده کړو کې خیاطي ده او دغه راز د سولر سیسټم زده کړې شاملې دي او همدرانګه د قرانکریم د حفظ او ناظرې له درسونو فارغ شوي. دا هغه کسان دي چې په زندان کې د اصلاح ښکاره علایم په کې ښکاري.»
د فراغت په دغو مراسمو کې د زندانونو چارو سمون ادارې مسوولینو وويل، د زندانیانو د ښې روزنې په موخه، په نږدې راتلونکي کې د هېواد په ټولو زندانونو کې د مسلکي زده کړو انسټیټیوټونه جوړېږي.د زندانو د سمون ادارې د ښوونې او روزنې رییس نظر محمد ناصري وايي: « نږدې راتلونکي کې به د ملکي او تخنیکي زده کړو لویه اداره چې مخکې یې دلته مدیر خبرې وکړې، د دوی په همکارۍ به په ټولو زندانونو کې منظم انسټیټیوټونه جوړ شي. هغه بندیان چې له نهم تر دوولسم ټولګي زده کړې ولري، موږ به دوی ته مسلکي او نظامي زده کړې ورکړو.»
د یادې ادارې مسوولینو زیاته کړې، نه یوازې زندانیانو ته به زده کړې ورکول کېږي بلکې هغوی چې د بند په موده کې يې زده کړې وکړي، د بند په موده کې به تخفیف هم ورکول کېږي.
د دوی په خبره، هڅه کېږي چې ټول زندانونه د زده کړې په مرکزونو بدل شي.
د زندانونو د سمون ادارې مرستیال حبیب الله بدر وايي: « کوشش مو دادی چې زندان د مکتب او مدرسې ځای جوړ کړو، نه د وهلو او ټکولو. په خدای مې دې قسم وي چې زما نه لوریږي د افغانستان یو بچی دې هم په زندان کې وي. الله تعالی دې داسې ورځ راولي چې د زندانو دروازې وتړل شي او تشکیل یې ختم شي.»
د مسوولینو د مالوماتو له مخې، اوسمهال د افغانستان په ټولو زندانونو کې ۹۶ دینې مدرسې فعالې دي چې زندانیانو ته په کې دیني زده کړې ورکول کېږي.
