ریچارډ لینزي د بریټانیا له لوري د افغانستان لپاره د ځانګړي استازي په توګه ټاکل شوی.
د بریټانیا دولت په دې اړه خپره کړې اعلامیه کې ویلي، ريچارډ لينزي به له دې وروسته د افغانستان په برخه کې د بریټانیا ځانګړي استازي په توګه عمل کوي.
نوموړی د ډېپلوماټيکې مخينې په لرلو سره په وروستي ځل د افغانستان او پاکستان لپاره د بریټانیا د ځانګړي استازي د مرستيال په توګه دنده ترسره کړې چې تازه يې د ځانګړي استازي په توګه ګومارل کېدل، د شنونکو له لوري پر نړيواله اجنډا کې د افغانستان شاملېدو په مانا بلل شوي.
دوی د بریټانیا له لوري د افغانستان لپاره د ځانګړي استازي ټاکلو یوه موخه دا يادوي چې دا هېواد غواړي د افغانستان په تړاو قضایاوو کې ښکېل پاتې شي.
د سیاسي چارو شنونکی معین ګل څمکنی وايي: « دا چې بریټانیا د افغانستان لپاره ځانګړی استازی ګومارلی، مانا یې دا ده چې بریټانیا غواړي د افغانستان په چارو کې ښکېله پاتې شي. زما په اند، د ځانګړي استازي ټاکل دا مانا لري چې افغانستان لاهم د هېوادونو په نظر او د پاملرنې په محراق کې ځای لري.»
ځینې نور بیا په دې باور دي چې ښکاري نړیواله ټولنه د افغانستان په مسايلو کې د دخالت دلچسپي لري او هیله ښي چې د هېوادونو دغه ډول کړنې به د سرپرست حکومت او نړيوالو ترمنځ د اړیکو لا ټینګښت لامل شي.
د سیاسي چارو شنونکی شهزاده مسعود وايي: « دا چې نړیواله ټولنه او په ځانګړې توګه بریټانیا لاهم په افغانستان کې له حضور سره دلچسپي لري، د استازي ټاکل یې موږ په نېک پال نیسو. د دې مانا دا ده چې نړیواله ټولنه په افغانستان کې زیاته دلچسپي لري او زه امېد لرم چې په دې سره زموږ اړیکې لا پسې ټینګې شي.»
د سیاسي چارو شنونکی ادریس محمدي ځاځی بیا وايي، زبرځواک هېوادونه په سیمه کې سیاسي او اقتصادي ګټې لري او له همدې کبله د افغانستان د جیوپوليټیک موقیعت په ارزښت پوهېږي.
د ځاځي په خبره، اوس هېوادونه هڅه کوي چې په فردي توګه د افغانستان په تړاو خپلې پالیسۍ داسې عیارې کړي چې نرمښت په کې وي.
ځاځی په دې اړه وايي: « د افغانستان سیاسي او اقتصادي ارزښت نړیوالو ته مالوم دی، په ځانګړې توګه شرق او غرب او د دوی متحدینو ته. دوی د افغانستان په جغرافیايي موقعیت او ارزښت ښه پوهېږي. دوی په افغانستان کې خپل استقامت، خپل سیاسي او اقتصادي ارتباطاتو او افغانستان سره خپل رغښت ته لمنه وهي، کار به کوي او په دې محور به پالیسۍ جوړوي.»
ټاکل شوې د افغانستان لپاره د بریټانیا نوی ځانګړی استازی ریچارډ لینزي په روانه جون میاشت کې رسماً خپله دنده پيل کړي.
