د مخابراتو او مالوماتي ټېکنالوژۍ سرپرست مولوي نجیب الله حیات حقاني چې څو ورځي وړاندي يې د سیمهییزو هېوادونو پر ۳۱مه غونډه کې د ګډون په موخه د ازبېکستان پلازمېنې تاشکند ته سفر کړی.
تازه يي د تاجکستان او اوزبکستان هېوادونو د ټکنالوژۍ له وزیرانو سره دري اړخېزه ناسته کړې
ناسته کې سرپرست وزیر د غیر ثابت مدار سپوږمکیو د سیسټمونو پر پراختیا، ټېلېکام سیسټمونو کې د درغلیو د مخنیوي او د آر.سي.سي پلس همکاریو چوکاټ په رامنځته کولو ټینګار کړی.
د مخابراتو او مالوماتې ټېکنالوژۍ وزارت ویاند عنایت الله الکوزی وايي:« د افغانستان اسلامي امارت د مخابراتو او مالوماتي ټېکنالوژۍ وزارت وزیر د ازبېکستان هېواد د ډيجیټل ټېکنالوژۍ او د تاجیکستان هېواد د صنعت او ټېکنالوژۍ وزیرانو ترمنځ درې اړخیزه لیدنه ترسره شوه. دغه لیدنه کې د کابل، دوشنبې او تاشکند ترمنځ د ټېکنالوژۍ د ودې او پرمختګ سیسټمونو، مخابراتو او پوستي خدمتونو او ورته نورو برخو کې البته د ټېکنالوژۍ اړوند پر سیمه ییزې همکارۍ خبرې شوې دي. د دې اړخیزې لیدنې په لړ کې د افغانستان اسلامي امارت د مخابراتو او مالوماتي ټېکنالوژۍ وزارت او د ازبېکستان او تاجیکستان هېوادونو د مخابراتو او مالوماتي ټېکنالوژۍ وزیرانو ترمنځ پر ګډو همکاریو هوکړه وشوه او پر یو شمېر موضوعاتو تفاهم هم وشو.»
ورته مهال د سیاسي چارو شنونکی وايي، افغانستان لاهم د ټکنالوژۍ برخه کې ډېر کار ته اړتیا لري او په دې برخه کې د مرستو د راجلبولو لپاره د ورته ناستو او کنفراسونو کې د سرپرست حکومت ګډون مهم دی.
د سیاسي چارو شنونکی ادریس محمدي ځاځی وايي:« نړۍ پرمختګ کوي، نړۍ ورځ په ورځ نوې ټېکنالوژي اختراع کوي او ټېکنالوژیکي پرمختګونه راځي. هلته داسې لیدنې او د ټېکنالوژۍ په اړه د افغانستان شتون اړین دی ترڅو وکولی شو، موږ هم په دې عصر کې په ټېکنالوژي باندې سمبال شو، له ټېکنالوژۍ سره اشنايي پیدا کړو، په ټېکنالوژۍ کې اختراع ګانې وکړو او کولی شو له نړۍ سره ګام په ګام مخته ولاړ شو.»
ځینې نور بیا ورځ تر بلې د ټکنالوژۍ برخه کې پرمختګ ته په کتو سره له دې او نورو هېوادونو سره په یاده برخه کې د مرستو او مسلکي کسانو پر روزنه ټینګار کوي.
د سیاسي چارو شنونکی توریالی ځاځی وايي:« اسلامي امارت باید د نړۍ نورو هېوادونو سره چې ډېر پرمختللي هېوادونه دي، له هغوی سره باید تعامل وکړي او تفاهم ته ورسره ورسېږي. له دغو ګاونډیو هېوادونو سره یوازې هغه خپلې ډېپلوماتیکې اړیکې ټینګې کړي.»
هېره دې نه وي چې د مخابراتو او مالوماتي ټکنالوژۍ سرپرست اوزبیکستان ته له سفر وړاندې، کابل کې د یاد هېواد له سفیر اویبک عثمانوف سره هم لیدلي و او دواړو لوریو په ټکنالوژۍ او نورو برخو کې د دوه اړخیزو همکاریو ډاډ ښودلی وو.
