د افغانستان د بهرنیو چارو وزارت چارسمبالی امیر خان متقي، چې د یو لوړپوړوي دولتي پلاوي پر مشرۍ پاکستان ته تللی، د ترویکا ناستې د غړو هېوادونو له استازو سره تر لیدنو وروسته یې پرون پلازمېنه اسلاماباد کې د سټراټیژیکو مطالعاتو انسټیټیوټ کې د وروستي تحول، نوي حکومت بهرنۍ پالیسۍ، پاکستان سره پر اړیکو او سیمه ییز اتصال خبرې وکړې.
متقي د سیمې اتصال لپاره افغانستان مهم بللی او ټینګار یې کړی، چې د سوېلي او مرکزي اسیا د وصل لپاره کار کوي.
متقي وايي:«موږ نه غواړو، هېواد مو د لویو قدرتونو د سیالۍ او مقابلو قرباني شي. موږ باور لرو، چې اقتصادي راکړه ورکړه او اقتصاد کې همګرایي د سیمې ثبات کې رول لري. افغانستان د خپل ځانګړي موقیعت له امله د سیمې په اتصال کې مثبت رول لوبولی شي او د سیمې اتصال کې د پل رول لوبولی شي. له ازبکستان، پاکستان ته د سوداګریزو توکو کاروان ورسېد. موږ به دې ته وده ورکړو.»
متقي د ګاونډ او سیمې هېوادونو د اندېښنو په اړه وايي، د دوحې تړون له مخې ژمن دي، چې د افغانستان خاوره به د هېڅ هېواد پر ضد ونه کارېږي او په افغانستان کې داسې ډله نه شته، چې د پاکستان ضد فعالیتونه دې وکړي.
متقي زیاتوي:« افغانستان کې اوس داسې ډلې نه شته، چې د پاکستان خلاف دې فعالیت ولري. موږ هم په دې هم خوشاله یو، چې د پاکستان حکومت او ټي ټي پي ترمنځ مذاکرات شوي او اوربند شوی دی. موږ هڅه کوو، چې دې ته ودوه ورکړو، ترڅو دا اوربند او مذاکرات دایمي شي. د دې عوامل پیدا نه شي، چې سبا لپاره ستونزه رامنځته کړي.»
داسلامي امارت د بهرنیو چارو سرپرست وزیر خپلو خبرو کې پر افغانستان د نړیوالو فشارونو ته هم اشاره وکړه، او زیاته یې کړه، چې کابینه خو ټول شموله ده، د هر قوم او سیمې خلک په کې شته، نړۍ دې له موږ نه غواړي، چې مخالف په کې ومنو.
متقي دغه راز غوښتنه وکړه، که نړۍ داسې اصلاحات غواړي، چې د افغانستان پر ګټه وي، نو د ګډ کار او همکارۍ له لارې دې ورسره مخته ولاړ شي او په وینا یې که بیا هم فشارونه راوړي، دا په دې مانا ده، چې له تېرو تجربو نه یې درس نه دی اخېستی.
امیر خان متقي د اسلام اباد ستراتېژيکو مطالعاتو مرکز کې له وینا وروسته، هلته مېشتو افغان کډوالو سره لېدنه کې د هغوی ستونزې او وړاندیزونه اورېدلي او د حل ډاډ یې ورکړی دی.
