د پاکستان پلازمېنه اسلاماباد نن پنجشنبه د «۱۴۰۰ کال د لړم پر ۲۰ مه» د افغانستان په تړاو د یوې مهمې څلور اړخیزې یا ترویکا ناستې کوربه و.
د ترویکا ناستې،چې پاکستان، امریکا، چین او روسیه یې غړي هېوادونه دي، د افغانستان په تړاو یې مهم بحثونه کړي.
د پاکستان بهرنیو چارو وزیر شاه محمود قریشي ناستې ته د وینا پر مهال وویل، طالبان له ټولو نړیوالو سره ښې اړیکې او تعامل غواړي او په وینا یې نړیوال نباید پخوانۍ تېروتنې تکرار کړي.
قریشي زیاته کړه:« موږ په دې باور یو،چې طالبان د دې غوښتوونکي دي،چې له نړیوالو سره اړیکې ولري او هغوی د نړیوال ملاتړ او منښت غوښتنه کوي. نو دا ډېره اړینه ده،چې نړیواله ټولنه خپلې پخوانۍ تېروتنې تکرار نه کړي او له یوه مثبت لوري مخ ته ولاړ شي.»
