د خوړو نړیوال پروګرام(ډبلیو.اېف.پي) یو ځل بیا په افغانستان کې د خلکو اقتصادي وضعيت او د دې سازمان د بودیجې کمښت په اړه اندېښنه ښودلې.
اړمنو ته د خوړو چمتو کولو دغه پروګرام وايي، روان دوبی په افغانستان کې شاوخوا ۳ میلیون تنه د ژوند ژغورنې په موخه خوراکي توکو ته جدي اړتیا لري، خو دغه پروګرام د بوديجې کمښت له امله یوازې له یو ميلیون افغانانو سره د يادو توکو مرسته کولی شي.
یاد پروګرام زیاته کړې:« په سږنې دوبي کې د افغانستان شاوخوا ۳ میلیون وګړي د ژوند ژغورنې لپاره مرستو ته اړتیا لري. خو ډبلیو.اېف.پي د بودیجې د سخت کمښت له امله یوازې له یو میلیون اړمنو وګړو سره د خوراکي توکو مرستې کولی شي، ترڅو د سختې لوږې مخه ونیسي.»
په ورته مهال، د اقتصاد وزارت مسوولین وايي، سرپرست حکومت د اړمنو افغانانو ستونزو حل او ملاتړ په موخه پلانونه لري، خو له نړیوالو سازمانونو غواړي چې له اړمنو افغانانو سره دې خپلو مرستو ته دوام ورکړي او ورته د کاري فرصتونو په رامنځته کولو کې دې همکاري وکړي.
د اقتصاد وزارت ویاند عبدالرحمن حبیب وايي:« دا چې په دې وروستیو کې په عمومي ډول د نړیوالې ټولنې له خوا د مالي تمویل د سرچینو کمښت له امله د بشري مرستو د یو شمېر بنسټونو فعالیتونه متأثره شوي، د هېوادوالو د کورني اقتصاد د ودې او پیاوړتیا لپاره د اړوندو ادارو له خوا په بېلابېلو برخو کې حمایتي او پراختیايي پروګرامونه په پام کې نیول شوي. د خوراک نړیوال پروګرام او مرسته کوونکو بنسټونو څخه غواړو چې زموږ له اړمنو هېوادوالو سره د بشري مرستو ترڅنګ، د کاري فرصتونو برابرولو او پراختیايي پروژو پلي کولو کې ونډه واخلي.»
د اقتصادې چارو شنونکي د افغانانو اقتصادي وضیعت ورځ تر بلې خرابېدونکی ګڼي او په خبره يې، د ياد وضعيت دوام افغانستان له نه جبرانېدونکو ناخوالو سره مخ کولی شي.
دوی وړانديز کوي چې سرپرست حکومت او نړيوال مرستندويان دې د وضعيت مهارولو لپاره ګډ کار ته دوام وکړي.
د اقتصادي چارو شنونکی نورالله عزیز وايي: « د بهرنیو مرستو کمېدل یا ځنډېدل د افغانستان پر اقتصاد باندې فوق العاده تأثیر لري؛ ځکه په تېرو څو لسیزو کې نړیوالو مرستو نه یوازې دا چې د خلکو په ژوند کې یې مهم رول لوبولی، بلکې ترڅنګ یې د افغانستان په داخلي اقتصاد کې چې هغه د بهرنیو اسعارو تقاضا ده، په مالي او پولي مارکېټ کې د بهرنیو اسعارو شته تقاضا، تر ډېره بریده د نړیوالو مرستو پر مټ پوره شوې ده.»
د ډبليو.ايف.پي او یو شمېر نورو مرسته کوونکو بنسټونو د مالوماتو پر بنسټ، اوس مهال په افغانستان کې ۲۲.۷ ميليونه وګړي بشري مرستو ته اړتيا لري.
