ظاهر قدیر نږدې ۲۰ ورځې وړاندې د کېنیا په پلازمېنه نایروبي کې د امریکا په غوښتنه ونيول شو.
پر نوموړي د امريکا له لوري تور دی چې د نشه يي توکو او وسلو په قاچاق کې لاس لري.
که څه هم امريکا ته يې د سپارل کېدو په اړه راپورونه خپاره شوي، خو د دې برعکس په نايروبي کې دوه ځلې محکمې ته وړاندې شوی او نن یې درېیمه محکمه شوې.
د راپورونو له مخې، محکمې پرېکړه کړې څو نوموړی امریکا ته وسپاري.
د ظاهر قدیر د کورنۍ غړي وايي، هغه د سياسي انګيزې له مخې نيول شوی او له سرپرست حکومته غواړي چې په راخلاصولو کې يې جدي هڅې وکړي.
د ظاهر قدیر د کورنۍ غړی عبدالجلیل قدیر وايي: « له حکومت مو غوښتنه دا ده چې د حاجي صاحب په آزادېدو کې جدي هلې ځلې وکړي، ترڅو دې قضیه کې غیرعادلانه پرېکړه ونه شي؛ ځکه دا یوه سیاسي مساله او دسیسه ده.»
شنونکي هم په ورته قضيو کې سرپرست حکومت مکلف بولي چې په بهر کې يې د اتباعو نيول کېدو په اړه له اړوند هېوادونو پوښتنه وکړي او په خبره يې، د دې ترڅنګ د اصولو له مخې نور هېوادونه هم اړ دي چې د افغان وګړو پر وړاندې هر ګام له اوچتولو وړاندې له سرپرست حکومت سره همغږي وکړي.
د سیاسي چارو شنونکی ادریس محمدي ځاځی وايي: « ظاهر قدیر یو افغان دی او افغانان د افغانستان په نوم کور لري. دا کور زعیم لري، مشران لري، قاضي، محکمه او حاکمیت لري. زما په نظر، په نورو هېوادونو کې د افغانانو نیول، شکنجه کول او محاکمه کول باید له افغانستان سره په تفاهم وشي. د افغانستان له اجرايي او قضايي قواوو سره په همغږۍ وشي. د ظاهر قدیر په ګډون باید د هغو ټولو افغانانو پوښتنه وشي چې په نورو هېوادونو کې محکمې پرې روانې دي.»
په همدې حال کې د بهرنیو چارو وزارت سرپرست مولوي امیرخان متقي د ظاهر قدیر د کورنۍ له غړو سره لیدلي.
د بهرنیو چارو وزارت دویم سیاسي رییس ذاکر جلالي بیا په دې تړاو ویلي، بهرنیو چارو وزارت سرپرست مولوي امیرخان متقي په قطر کې د افغانستان سفارت ته لارښوونه کړې چې د ظاهر قدیر موضوع په دوحه کې د کېنیا له سفارت سره تعقیب کړي.
جلالي په دې اړه ویلي: « نظام د هر افغان په تړاو مسووليت لري چې له هر ډول توپير پرته يې بايد د حق پوښتنه وکړي او بې پوښتنې يې پرې نږدي. امارت دا ادعا د ظاهر قدير په حق کې عملا ثابتوي. د بهرنيو چارو وزير د ظاهر قدير د کورنۍ غړي راغوښتي وو او هغوی سره يې تر ليدنې وروسته دوحه کې د افغانستان سفارت ته دنده وسپارله چې د کېنيا له سفارت سره د ظاهر قدير موضوع تعقيب کړي.»
په کېنیا کې د ظاهر قدیر مدافع وکیل اومګا اوچینګ بیا د نوموړي د دویمې محکمې چې د تېرې پنجشنبې په ورځ ترسره شوه له پای ته رسېدو وروسته ویلي، پر هغه د قاچاق او غیر قانوني وسلو د درلودو تورونه پورې شوي، خو د ظاهر قدیر دغه نیونه سیاسي انګیزه لري.
