د هند او پاکستان ترمنځ د جګړې د پيل له لومړۍ ورځې شاوخوا يوه اوونۍ تېرېږي چې په پایله کې يې دواړو خواوو ته د ملکي مرګ ژوبلې اوښتو ادعاوې شوې دي.
تازه د پښتون ژغورنې غورځنګ مشر منظور احمد پښتين وايي، د پاکستان پوځ د شمالي وزيرستان په جانې خېلو، بنو او د خيبرپښتونخوا په ځينو سيمو کې عام خلک د بې پيلوټه الوتکو په بريدونو کې پر نښه کړي.
د پښتين په خبره، په دې بريدونو کې د ښځو او ماشومانو په ګډون شاوخوا ۱۰ کسان ټپيان شوي چې دې او ورته نورو بريدونو له امله يې پوځ له عامو پښتنو سره پر تاوتريخوالي او ظلم تورن کړی.
پښتين زیاتوي:« پرون مازدېګر د خيبرپښتونخوا په بنو او جانې خېلو کې د پاکستان پوځ د بې پيلوټه الوتکو په وسيله پر بې ګنا او عامو پښتنو هوايي بريد کړی چې د مالوماتو له مخې، تر اوسه ۱۰ ښځې او ۴ ماشومان په دې بريد کې ټپيان شوي دي. نه يوازې په بنو بلکې په ټانک، سوېلي او شمالي وزيرستان، تېرا او باجوړ کې هم پر عامو پښتنو د پاکستان د پوځ ظلم دوام لري.»
د يادو بريدونو له امله په بنو کې د پښتون ژغورنې غورځنګ پر مشرۍ پراخ لاريونونه هم شوي چې موخه يې پر ملکيانو د پاکستان د پوځ ظلم او دغه راز د پوځ له لوري د دوی ځپلو لپاره د عملياتو درول دي.
پښتين په دې اړه وايي: « دوی زموږ هېوادوال دي، موږ دوی يوازې نه پرېږدو، ټول يې ترڅنګ درېږو. پر لاريونوالو ډزې د پښتنو په خاوره کې له سولې سره د رياست د ښکاره مخالفت ثبوت دی.»
د سیاسي چارو يو شمېر شنونکي هم له پښتنو سره د پاکستان د پوځ چلن د بشري حقونو او د نړيوالو کنواسيونونو نقض بولي او پر مخنيوي يې ټينګار کوي.
د سياسي چارو شنونکی حکمتالله حکمت وايي: « ټول هغه راپورونه چې د پاکستان پوځ او پلویانو یې خپاره کړي، ګویا هندوستان مسجد ویشتلی یا هندوستان د پښتنو او بلوڅانو خاوره بمبار کړې، دا د پاکستان د پوځ او آی.اېس.آی دروغجن او له حقیقت لرې پروپاګند دي چې نه دوی خپله باور پرې لري او نه هم نړۍ پرې باور کوي.»
د سیاسي چارو شنونکی محمد سلیم پیګیر وايي: « که د ښاغلي منظور پښتین ادعا حقیقت ولري، دا د خیبر پښتونخوا د خلکو پر وړاندې یو جنګي جنایت دی.»
له دې وړاندې د پښتون ژغورنې غورځنګ په خيبر تاريخي دره کې د پښتنو جرګه ترسره کړه او له يادې جرګې له لوري پوځ ته د ورکړل شوي درې ورځني مهلت په تېرېدو سره، پښتون ژغورنې غورځنګ په مکرره توګه له پوځ او حکومت غواړي چې د خلکو پرېکړې ته احترام وکړي او ورسره روان ناوړه چلن بدل کړي.
