د پاکستان د لومړي وزیر مرستیال او د بهرنیو چارو وزیر محمد اسحاق ډار د تېرې اپریل میاشتې پر ۱۹ کابل ته د خپل سفر د پایلو ارزونې په موخه غونډه رابللې وه.
د پاکستان د بهرنیو چارو وزارت د اعلامیې له مخې، اسحاق ډار په دې ناسته کې ټینګار کړی چې هېواد یې له ګاونډیو سره د سوداګرۍ پراخولو، سیمه ییز اتصال رامنځته کولو، دوامداره پرمختګ او هوساینې ته د وده ورکولو پر بنسټ سوله اییزې اړیکې غواړي.
د سیاسي چارو شنونکي په دې اند دي چې پاکستان په ځلونو ازمایل شوی، خو داځل باید خپلو هغو کړو ژمنو ته چې د بهرنیوچارو وزیر یې کابل کې له افغان چارواکو سره وکړې، ژمن پاتې شي.
د سیاسي چارو شنونکی شهزاده مسعود وايي: « آخري ځل پلاوی چې د پاکستان د بهرنیو چارو وزیر پر مشرۍ راغلی و، دلته یې چارواکو سره په ځینو مسایلو توافق وکړ چې په ډله کې یې په آبرومندانه بڼه د مهاجرینو د راستنېدو خبره وه، تجارتي، اقتصادي او نور مسایل وو چې په اړه یې باید اوس عملي اقدام شوی وای. که چېرې پرې عمل ونه کړي، د پخوا په څېر به لکه څرنګه چې دوی تل دوه مخی سیاست لوبولی، نه به د دوی پر ګټه وي او نه زموږ پر ګټه.»
ځینې نور بیا په دې باور دي چې د پاکستان بهرنیو چارو وزیر کابل ته د خپل سفر پرمهال په بېلابېلو برخو کې ژمنې کړې وې چې د کډوالو د ستونزو حل ترڅنګ، د سوداګرۍ او ټرانزیټ برخې هم په کې شاملې وې.
دوی وايي، که څه هم پاکستان د افغانانو پر وړاندې خپل باور بایللی، خو دا ځل باید پر خپلو ژمنو واقعي مانا عمل وکړي.
د سیاسي چارو شنونکی معین ګل څمکنی وايي: « دا چې په دې وروستیو کې د پاکستان د صدراعظم مرستیال اسحاق ډار کابل ته سفر درلود او په کې یې د ډېرو مسایلو په اړه اطمینان ورکړ چې دوی به د تجارت، ټرانزیټ او مهاجرینو مسایلو ته د پای ټکی ږدي، خو اوس داسې ښکاري چې هماغه خرک او درک دي. باید ووایم چې پاکستان نور د افغانستان د خلکو پر وړاندې باور بایللی دی.»
د سیاسي چارو شنونکی سلیم پيګیر بیا وايي، د افغانستان پر وړاندې د پاکستان د لسیزو سیاست ته په کتو، دا هېواد د خپلو ژمنو په پوره کولو کې ریښتینی نه دی او پر اسلام اباد باور به سیاسي تېروتنه وي.
پیګیر په دې اړه وايي: « دا لومړی ځل نه دی او وروستی به هم نه وي چې پاکستان اسلامي امارت او د افغانستان له خلکو سره ژمنې کوي، خو هېڅکله یې نه دي عملي کړې. زه باور نه لرم چې دا ځل به هم د پاکستان استازی چې کابل ته یې سفر کړی و، په خپلو ژمنو عمل وکړي. بنا ً، په پاکستان باور کول یوه تېروتنه ده.»
کابو دوې اوونۍ وړاندې د پاکستان لومړي وزیر مرستیال محمد اسحاق ډار د یوه پلاوي پر مشرۍ کابل ته راغی او دلته یې د اسلامي امارت له چارواکو سره د کډوالو ستونزو د حل، سوداګرۍ او ټرانزیټ په برخو کې د اسانتیاوو راوستو ترڅنګ، د دواړو هېوادونو ترمنځ د سیاسي اړیکو د پراختیا په برخه کې هم هوکړې وکړې چې د افغانستان بهرنیوچارو وزارت یې هماغه مهال د عملي کېدو غوښتنه وکړه.
