د افغانستان د بېلابېلو ولایتونو او یو شمېر بهرنیو هېوادونو د مطرحو پوهنتونونو څېړونکي په ننګرهار ولایت کې سره راټول شوي او پر دې بحث کوي چې څنګه کولی شي د افغانستان کورني اقتصاد ته دوامداره پرمختګ ورکړي.
په دې کنفرانس کې څېړونکو کرنه، مالداري او کوچني کاروبارونه د کورنیو اقتصادي پیاوړتیا لپاره مهم وبلل او پر ملاتړ یې ټینګار وکړ.
څیړونکی جواد خوشحال وايي: « کولی شو ووایو چې د افغانستان اصلي اقتصاد، کورنی اقتصاد دی. په کورني اقتصاد کې د افغانستان کرنه، مالداري، کورني تولیدات، کوچني کاروبارونه او نور شامل دي.»
د لوړو زده کړو وزارت سرپرست دغه ډول کنفرانسونه په اقتصادي وده کې مهم بولي او ډاډ ورکوي چې د دې کنفرانسونو علمي پایلې به د بېوزلۍ په مخنیوي کې اغېزناکې تمامې شي.
شیخ ندا محمد ندیم وايي، د سرپرست حکومت له مشرتابه یې وزارتونو کې د داسې علمي څېړنو د پایلو عملي کولو اجازه هم ترلاسه کړې او وزارتونه به د پلانونو او پالیسیو په جوړولو کې ترې ګټه پورته کوي.
ندیم په دې اړه وايي:« هغه سکټوري وزارتونه چې زموږ د استادانو له علمي استعداد سره د دوی کار دی، زموږ نظام باید د دې استادانو له وړتیاوو ګټه واخلي. آیا دلته نه پیدا کېږي چې د ښاروالۍ لپاره انجینر له خارج راوړل کېږي؟ زموږ د استادانو له وړتیاوو او استعدادونو دې استفاده وشي، ترڅو د دوی له ظرفیتونو ګټه پورته شي.»
د ننګرهار ځايي مسوولین یو ځل بیا پر بهر مېشتو پانګوالو غږ وکړ چې په کوردننه پانګونه به يې کاري زمینې ډېرې کړي.
د ننګرهار ولایت مرستیال مولوي عزیز الله مصطفی وايي: « کله چې زموږ کورني تولیدات زیات شي، زموږ اقتصاد خپله وده کوي؛ ځکه چې موږ دا تولیدات بهرنیو هېوادونو ته صادروو او په بدل کې یې موږ ته پيسې راځي. کله چې جیب ډک شي، بیا هرڅه کېږي. په دې سره به د افغانستان ټولې بدبختۍ خلاصې شي، له هجرتونو به راوګرځو او ځوانان به مو د کبانو خوراک نه کېږي.»
د دې علمي کنفرانس د لومړۍ ورځې د مقالو له پایلو ښکاري چې له انساني قوې او هېواد کې له شته سرچینو د سالمې ګټې اخیستنې سربېره کرنې، مالدارۍ او اوبو مدیریت ته پاملرنه د هېواد اقتصاد ته وده ورکولی شي.
