د اوچا عمومي رییس او په بشري چارو کې د ملګرو ملتونو د سر منشي مرستیال هېواد ته د تېرې ورځې د سفر او دلته د بهرنیو چارو وزارت د سرپرست مولوي امیرخان متقي سره په لیدنه کې پر ګڼو موضوعاتو خبرې کړې.
ټام فلېچر پر خپله اېکس پاڼه لیکلي، په دې لیدنه کې یې په افغانستان کې پر بشري ننګونو، اقلیمي بدلون او په امنیتي او نشه یي توکو سره د مبارزې په برخه کې پر وروستیو پرمختګونو خبرې کړې.
فلېچر ویلي، د دې لیدنې او بحثونو اصلي اجنډا یې د افغان ښځو د پراخو ظرفیتونو پر شتون او دا چې د ښځو له ګډون او د زده کړو حق ته له پوره لاسرسي پرته افغاني ټولنه پرمختګ نه شي کولی، متمرکزه وه.
فلېچر په دې اړه ویلي: « په دې لیدنه کې مو پر بشري ننګونو، اقلیمي بدلون او د امنیت او نشه یي توکو په برخه کې پر پرمختګونو بحث درلود. زموږ د لیدنې او بحثونو اصلي اجنډا د افغان ښځو پراخ ظرفیت او دا وه چې د ټولنې پرمختګ د نجونو له زده کړو او د هغوی له پوره ګډون پرته ناشونی دی.»
که څه هم د تېر پرتله په هېواد کې د بشري ننګونو او امنیتي ګواښ کچه ټیټه شوې، خو د اقلیم د ناوړه بدلون اغېزې لاهم افغانستان ګواښي.
بل پلو، سره له دې چې اسلامي امارت ویلي، په هېواد کې یې نجونو او ښځو ته د هغوی شرعي حقونه ورکړي، خو لا هم د نجونو او ښځو پر زده کړو او کار لګېدلي محدودیتونه د نړيوالې ټولنې اساسي اندېښنې بلل کېږي چې وخت ناوخت سرپرست حکومت په دې اړه بیاځل فکر ته رابولي.
د سیاسي چارو شنونکی اخترمحمد راسخ وايي: « د سیمه ییزو هېوادونو او نړیوالې ټولنې له ادرسه چې کومې کړنې د رسمیت پېژندنې، ښو اړیکو جوړولو، د ډېپلوماټیکو او اقتصادي پروګرامونو عملي کولو لپاره روانې دي، دا د افغان ولس او طالبانو د حکومدارۍ په خیر ده چې افغانستان له سیاسي انزوا ووځي او د نړۍ له خوا پر رسمیت وپېژندل شي.»
د نظر خاوندان په هېواد کې وروستي پرمختګونه ستایي، خو پر سرپرست حکومت غږ کوي چې د ولس او نړۍ هغه مشروع غوښتي ومني چې د شاوخوا څلورو کلونو په تېرېدو لاهم د رسمیت پېژندنې او تعامل ترمخ د نړيوالې ټولنې سره کرښه بلل کېږي.
دوی زده کړې او کار د هر انسان اساسي حق ګڼي او له دې حقه د وګړو راګرځول له اسلامي او نړيوالو اصولو سره په ښکاره ټکر کې بولي.
د سیاسي چارو شنونکی خلیل احمد نادم وايي: « نړۍ ورته پام اړولی او نوموړی د دې لپاره راغلی چې طالبان وهڅوي چې د نجونو پرمخ د ښوونځیو دروازې خلاصې کړي، پوهنتونونه خلاص کړي؛ ځکه چې ښځې د یوه هېواد په پرمختګ او د ماشومانو په روزنه کې ډېر رول لري، د هرې ټولنې نیمايي ښځې دي او دا ډېره اړینه ده چې طالبان دغې برخې ته توجه وکړي، خپل مشران وهڅوي، ترڅو په دې لاره کې شته خنډونه لري او له نړۍ سره تعامل وکړي. د تعامل په سیوري کې افغانستان پر رسمیت پېژندل کېدای او وده کولی شي.»
هېواد ته په بشري چارو کې د ملګرو ملتونو د مرستیال ټام فلېچر سفر او پر یادو موضوعاتو بحث داسې مهال شوی چې د بهرنیو چارو وزارت تېره ورځ له مولوي امیرخان متقي سره د نوموړي د لیدنې د خبر ترڅنګ ویلي و چې دواړو لوریو له ګاونډيو هيوادونو د راستنېدونکو افغانانو، د طبيعي آفتونو پر وړاندې چمتووالي، کروندګرو ته د بديل معيشت برابرولو، د معتادينو د درملنې او ګڼو برخو خبرې کړې دي.
