Skip to content
د افغانستان بیارغونې لپاره د امریکا ځانګړې څارونکې اداره یا سیګار په یوه راپور کې، چې پرون خپور شوی ویلي، په تېره شل کلنه جګړه کې تر ټولو زیاته قرباني افغان ځواکونو ورکړې، چې له ۷۰ زرو زیات په کې وژل شوي دي.
دغه راز په دې راپور کې د ۲۰۰۱ زېږدیز کال د اکټوبر له ۷مې نېټې د ۲۰۲۱ کال د اګسټ تر پایه په افغانستان کې د وژل شوېو امریکايي سرتېرو شمېر ۱۹۱۰ تنه ښودل شوی دی.
د سیګار راپور یوه برخه :«په تېرو شلو کلونو کې له اویا تر اتیا زره افغان ځواکونه وژل شوي او د ۲۰۰۱ کال د اکټوبر له ۷مې نېټې د ۲۰۲۱ کال د اګسټ میاشتې تر ۳۱مې نېټې ۱،۹۱۰ امریکايي پوځيان وژل شوي او څه باندې ۲۰ نیم زره پوځیان ټپیان شوي دي.»
په دې راپور کې د هغو بهرنیو وژل شویو قراردادیانو شمیر هم وړاندې شوی، چې څه باندې ۴۰ امریکايي اتباع هم په کې شامل دي.
د سیګار راپور یوه برخه:« په تېرو ۱۸ کلونو کې هغو قراردادیانو، چې د بیارغونې برخه کې یې کار کاوه، ۱،۲۳۳ تنه یې وژل شوي، چې ۴۵ په کې امریکايي وګړي وو. په دې موده کې شااوخوا ۱۵۰ قراردادیان ټپیان شوي، چې ۳۸ تنه په کې امریکايي اتباع شامل وو.»
سیګار په یوولس ورځو کې د ۳۰۰ زرو افغان ځواکونو د ماتې یو شمېر لاملونه هم وړاندې کړې، چې اړین فکټورونه یې په لاندې ډول دي.
د سیګار راپور یوه برخه:«د طالبانو ستراټيژي چې لومړی لرې پرتې سیمې ونیسي او بیا په تدریجي ډول ښارونو ته راشي.
د امریکايي ایتلاف ژر بدلېدوونکې نظامي سټراټيژي.
له ۲۰۰۳ کال تر ۲۰۱۰ زېږدیز کال پورې له افغانستانه د امریکا پام د عراق لور ته اوښتل.
پاکستان او په قبایلي سیمو کې د جګړه ییزو ډلو شتون.
د افغان ځواکونو کمزوری رهبریت او په حکومت او نظامي برخه کې پراخ فساد.»
د سیګار راپور کې ویل شوي، چې په افغانستان کې د امریکايي ځواکونو وروستۍ قرباني د هوايي ډګر برید و، چې ۱۳ تنه په کې وژل شوي او ۱۸ امریکايي پوځیان په کې ټپیان دي.
یاد راپور په دغه خونړۍ پیښه کې د وژل شویو افغان ملکي وګړو شمیر ۱۲۰ تنه او د ټپیانو څه باندې ۲۰۰ تنه ښودلی دی.
