د پاکستان او هند ترمنځ د جنجال پر دوام د ياد هېواد لومړي وزير شهباز شريف يو وار بيا پر افغانستان تور لګولو ته مخه کړې او تازه يې ويلي، لاهم دغه هېواد ته له افغانستانه ګواښ متوجې دی.
هغه دا څرګندونې په پاکستان کې د يوه پوځي پرېډ پرمهال کړې او ويلي يې دي، هېواد يې لېواله دی چې له افغانستان سره په سوله کې واوسي، خو د نوموړي د ادعا له مخې، په دې اړه د پاکستان پر هڅو سربېره هم د افغانستان له خاورې ورته ګواښ موجود دی.
شریف زیاته کړې:« موږ ډېره لېوالتيا لرو چې له افغانستان سره د تل په سوله کې واوسو. له بده مرغه په دې اړه زموږ پر صادقانه هڅو سربېره هم ترهګريز فعاليتونه د افغانستان له خاورې کېږي. موږ به له ورور او ګاونډي هېواد افغانستان سره د ښو اړيکو لرلو او متقابل پوهاوي هڅو ته دوام ورکوو.»
له هند سره پر جنجال اخته شهباز شريف دا هم وايي، پر ضد يې د افغانستان خاورې د کارېدو په صورت کې له دې هېواد سره د ښو اړيکو لرلو امکان نشته او اړتيا ده چې په دې برخه کې ګډې هڅې وشي.
هغه په دې اړه وايي:« که څه هم موږ د افغانستان سرپرست حکومت ته له کابل سره سولهييزو او د ګاونډيتوب اړيکو لرلو په اړه خپله لېوالتيا ښودلې؛ خو دا روښانه پيغام مو هم ورکړی، څو چې د افغانستان له خاورې تحريک طالبان پاکستان پر پاکستانيانو د بريد لپاره استفاده کوي، دا کار ناشونی دی.»
خو سرپرست حکومت د پاکستان لومړي وزير څرګندونو په اړه څه نه وايي.
بل خوا د سیاسي چارو یو شمېر شنونکي وایي، په اوسنیو شرایطو کې چې د پاکستان اړیکې له هند سره کړکېچنې دي، هڅه کوي په ورته څرګندونو سره وضعيت مهار او افغانستان د ترهګرۍ په تور تورن کړي.
د سیاسي چارو شنونکی اسماعیل ځدراڼ وايي:« دوی دا دوه مخې پالیسي پر مخ بیايي. اوس دلته د اسلامي امارت مشرانو ته په کار ده چې داسې واضح او غوره پالیسي جوړه کړي چې وکولی شي د افغانستان په اړه چې دوی (پاکستان) کومې څرګندونې کوي، دغه څرګندونې پر دوی ورواوړي. پر دوی ور تاوان شي، ځکه چې دا هر څه په دوی کې دي. ستونزې ټولې په دوی کې دي.»
دا داسې مهال ده، چې روانه اپریل میاشت کې د بهرنیو چارو وزیر او د افغانستان لپاره د پاکستان ځانګړي استازي پر مشرۍ د پاکستان دوه بېلابېل پلاوي کابل ته راغلي وو، چې د افغانستان له چارواکو سره یې د دواړو هېوادونو پر شریکو مسایلو خبرې وکړې او د اړیکو د استحکام لپاره دواړو لوریو د سوداګرۍ، ټرانزېټ او د کډوالو ستونزو د حل په برخه کې ژمنې کړې وې.
