Skip to content
په افغانستان کې د ملګرو ملتونو پخواني سفیر کای ایډه ویلي، د امریکا له لوري د افغانستان شتمنۍ کنګل یوه بې مانا پرېکړه ده او په وینا یې ښه به دا وي، چې امریکا له افغانستان سره د بشري مرستو او اقتصادي همکاریو لپاره لاره پرانېزي.
کای ایډه زیاته کړې:«امریکا له افغانستان وتلې ده او هغه مهال چې بهرني ځواکونه لا په کابل کې وو، طالبانو د افغانستان واک واخېست او په وینا یې امریکا له طالبانو سره میاشتې میاشتې په دوحه کې مذاکرات وکړل، نو بیا تر دې هر څه وروسته د پیسو کنګل اعلان کول بې منطقه او بې مانا پرېکړه ده.»
اقتصاد پوهان هم په هېواد کې د روان اقتصادي او بشري ناورین یوازینی لامل د امریکا له لوري د افغانستان شتمنۍ کنګل یادوي او ټنیګار کوي، چې د دې پيسو ځنډول به شته ستونزې څو برابره کړي.
اقتصادي چارو شنونکی میرویس حاجي زاده وايي:« کومې پیسې، چې امریکا کنګل کړي، دا د ملت پیسې دي. دا د حکومت نه دي، ځکه هلته په نړیوالو بانکونو کې پرته پانګه د نړیوالو نه بلکې دافغانانو دي، کنګل شوې پیسې د افغانانو ژوند له سخت بحران سره مخ کړی دی.»
اسلامي امارت هم په وار وار له ملګرو ملتونو غوښتي، چې په امریکا فشار راولي، ترڅو د افغانستان کنګل شوې پیسې بېرته ورکړي، خو مثبته پایله یې نه ده ورکړې.
بلال کریمي د اسلامي امارت مرستیال ویاند وايي:« اسلامي امارت هڅې کوي، ترڅو کنګل شوې پیسې خوشي کړي خو له ملګرو ملتونو او نورو هېوادونو غواړو چي همکاري وکړي.»
امریکا پر افغانستان د طالبانو واکمن کېدو سره د افغانستان شااوخوا لس میلیارده ډالره شتمني کنګل اعلان کړه، چې شااوخوا درې میلیارده یې د افغان ملي سوداګرو دي.
د امریکا له دې پرېکړې سره افغانستان له اقتصادي ناورین سره مخ شوی او له نیمايي زیات افغانان له فقر کړېږي.
