د امریکا کورني امنیت وزارت تېره جمعه له دې هېواده د هغو ۱۴زره او ۶۰۰ افغانانو د ډېپورټ کولو خبرداری ورکړ چې په دې هېواد کې د لنډ مهال لپاره مېشت کړای شوی وو.
دا هغه کډوال دي چې په تېرو شاخوا څلورو کالو کې د لنډمهاله مېشتېدنې لپاره دې هېواد ته ورغلي وو، خو د امریکا د حکومت دا پرېکړه په کور دننه له نیوکو سره مخ شوې.
په امریکا کې د اسلامي اړیکو شورا په یوه خبرپاڼه کې د لنډمهاله خوندیتوب طرحې (ټي.پي.اېس) پای ته رسولو پرېکړه له اخلاقي او بشري مکلفیتونو سره خیانت بللی.
خبرپاڼه کې ویل وشوې، د یادې پرېکړې عملي کېدل د هغو کسانو ژوند له خطر سره مخ کولی شي چې د امنیتي او ګڼو نورو ستونزو له امله امریکا ته کډه شوي.
د خبرپاڼې یوه برخه: « افغانانو او کامرونیانو ته د لنډمهاله خوندیتوب طرحې پای ته رسول د کډوالو ضد د ټرمپ ادارې د اجنډا ظالمانه او ګواښونکي پراخول دي او زموږ اخلاقي او بشري مکلفیتونو ته شرموونکی خیانت دی. دغه کسان د جګړې، څارنې او بې ثباته حالت څخه تېښتې ته اړ شوي چې د ګڼو هغو ژوند په تېر کې له امریکا د ملاتړ له کبله په خطر کې دی.»
د امریکايي اسلامي اړیکو شورا دغه پرېکړه د کډوالۍ ضد پالیسي ګڼي چې په خبره یې کولی شي د امریکا د حکومت پر هغو ژمنو بارو له منځه یوسي چې د بشري حقونو د ساتنې په برخه کې یې کړې دي.
د خبرپاڼې یوه برخه: « دغه پرېکړه به د کورنیو د جلا کېدو لامل شي او خلک به څنډې تللو ته اړ کړي. د دې ترڅنګ د لنډمهاله خوندیتوب طرحه ښايي د ځینو هغو لپاره د بېرته اړولو د ساتنې یوازینۍ غوراوی وي. دا د ټرمپ ادارې هغه بل مثال دی چې په موږ کې د اړمنو هدف ګرځولو لپاره د کډوالۍ له پالیسۍ کار اخلي. ورته پرېکړې زموږ په ټولنه کې وېره خپروي او د بشري حقونو ساتنې په برخه کې زموږ د حکومت پر ژمنو باور له منځه وړي.»
د دې پرېکړې له مخې ۱۴زره او ۶۰۰ سوه افغان کډوال اړ دي چې له امریکا څخه د جبري ایستنې وړاندې له امریکا څخه د باندې ځان ته د اوسېدلو زمینه برابره کړي.
لنډمهال کډوالو ته د امریکا د حکومت دغه طرحه څو لسیزې وړاندې قانوني شوې او د شپږو تر اتلسو میاشتو د هغو کډوالو لپاره ده چې د جګړې، بشري حقونو او طبیعي پېښو له کبله اغېزمن شوي وي.
د کډوالو د حقونو مدافع علیرضا کریمي وايي: « د دې ملاتړ پای نا عادلانه او اندېښمنوونکی دی. امریکا باید د افغان کډوالو په اړه خپل اخلاقي مسوولیت ومني.»
د امریکا د کورني امنیت وزارت وزیرې کرېسټي نووم ویلي، په افغانستان او کامرون کې چې کډوال یې له ورته برخلیک سره مخ دي، وضعیت ښه دی او تر دې ورهاخوا د لنډمهاله خوندیتوب طرحې غځولو شرایط نه لري.
د کډوالو د حقونو چارو فعالان بیا د قانوني حللارو له مخې دغو کډوالو ته د مېشتېدنې د اسنادو پر ورکړې ټینګار لري.
د کډوالو د حقونو چارو فعال عبدالرازق عدیل وايي: « د امریکا د حکومت دغه پرېکړه د مهاجرت ضد سیاستونو د شدید نښه ده او د زرګونه افغانانو ژوند له ګواښ سره مخ کوي. له انساني پلوه د هغو کسانو شړل چې له جګړو او نا امنیو تښتېدلي، نه یوازې د امریکا اخلاقي ژمنتوب تر پوښتنې لاندې راولي بلکې ښايي افغانستان کې هم د لا پراخو بحرانونو سبب شي. با ثباته حل لاره د افغانستان عیني واقعیتونو ته په کتو د دغو کسانو د دایمي استوګنې لپاره د قانوني لارو موندل ده.»
د کډوالو د ایستنې په تړاو د امریکا د ولسمشر ډونالډ ټرمپ دغه پرېکړه داسې مهال مطرح شوې چې نوموړي واک ته له رسېدو سره سم په تېره جنورۍ میاشت کې د ریکارډ تر کچې د غیر قانوني کډوالو د اېستنې ژمنه کړې وه.
