په داسې حال کې چې له پاکستانه په جبري توګه د افغان کډوالو د ايستلو دويم پړاو ادامه لري، ملګري ملتونه وايي، په وروستيو ۱۰ ورځو کې نږدې ۴۵ زره افغانان له ياد هېواده ايستل شوې دي.
د دې سازمان د کډوالو عالي کمېشنرۍ (یو.اېن.اېچ.سي.آر) له لوري خپور شوې راپور کې ویل شوې، د يادو کسانو له ډلې څه باندې ۱۴ زره يې په زور ايستل شوي او شاوخوا ۱۶۵۵ نور افغانان د پاکستاني پوليسو له لوري نیول شوي او لاهم په زندان کې پراته دي.
راپور زیاتوي، د پاکستان له لوري د افغان کډوالو د جبري ايستلو لومړی پړاو د نومبر له لومړیو ۱۰ ورځو وروسته،۳۱ سلنه چټک شوی.
د راپور یوه برخه: « د روان کال د اپریل له پيل راهیسې ۴۰۰ زره ۹۰۰ تنه افغان کډوال له پاکستان خپل هېواد ته راستانه شوي چې له ډلې يې ۱۴ زره او ۱۰۰ تنه په جبري توګه اخراج شوې دي. د ۲۰۲۵ کال د اپریل په لومړیو ۱۰ ورځو کې دغه اخراج د ۲۰۲۳ کال د نومبر د لومړیو ۱۰ ورځو پرتله ۳۱ سلنه زياتوالی موندلی.»
پاکستان له څو ورځو راهيسې زرګونه افغانان له بېلابېلو ښارونو په جبري توګه اخراج کړي.
هلته مېشت کډوال له نړيوالو سازمانونو او سرپرست حکومته غواړي چې ستونزو ته يې رسېدنه وکړي.
پاکستان مېشت افغان کډوال ملک مجاهد شینواری وايي: « له افغان مهاجرینو سره د پاکستاني پولیسو چلن غیر انساني دی. کډوال د کارټونو له لرلو سربېره نیول کېږي او د شړلو لپاره انتظارخانو ته استول کېږي. په دغو انتظار خونو کې له څو ورځو تېرولو وروسته د تورخم له لارې افغانستان ته اخراج کېږي.»
پاکستان مېشته افغان کډواله طیبه رستاخیز وايي: « په پاکستان کې د افغان مهاجرانو وضعیت د اندېښنې وړ دی. هره ورځ د پولیسو کور په کور تلاشۍ ادامه لري او ګڼ شمېر کسان یې نیولي دي. موږ وینو چې اکثریت نیول شوي کسان هغوی دي چې دلته یې ډېر کالونه ژوند کړی.»
له دې سره، د پاکستان د کورنیو چارو وزارت مرستیال طلال چودري د جمعې په ورځ(د اپریل پر ۱۱ مه) وویل، د افغان کډوالو د ايستلو مهلت نه غځول کېږي او هلته د مېشتو افغانانو د کډوالۍ اې.سي.سي کارتونو موده د مارچ پر ۳۱مه پای ته رسېدلې ده.
له دې سره د کډوالو د حقونو فعالان د پاکستان له لوري د دوی جبري اخراج د ټولو اصولو خلاف بولي او له ملګرو ملتونو غواړي چې د کډوالو ستونزو ته د پای ټکی کېږدي.
د بشري حقونو مدافع علیرضا کریمي وايي: « له پاکستانه د زرګونه افغان مهاجرانو شړل له بشري حقونو سرغړونه ده. د کډوالو په چارو کې د ملګرو ملتونو عالي کمېشنري باید بېړني ګامونه پورته کړي او د پاکستان پر حکومت د ډېپلوماټیکو فشارونو له لارې د مهاجرانو له اخراج مخنیوی وکړي.»
د بشري حقونو مدافع ګلا خان بهادري وايي: « په پاکستان کې له افغان کډوالو سره روان ظلم او زیاتی وروستي حد ته رسېدلی. د پاکستان پولیس هغه لحظه د افغانانو په کورونو چاپې وهي، نیسي یې، وهي یې او بیا یې زندانونو ته اچوي. د پاکستان پولیس هېڅ ډول بشري حقونو او د کډوالو حقونو ته ژمن نه دي.»
د کډوالو او راستنېدونکو چارو وزارت تازه له پاکستانه د راستنېدونکو افغانانو په اړه څه نه دي ویلي، خو موده وړاندې يې د پاکستان دا پرېکړه نا عادلانه بللې وه او په خبره يې، په دې اړه يې خپلې ټولې اندېښنې له پاکستاني چارواکو سره شريکې کړې دي.
