د افغانستان په اړه د مسکو فارمت او د ایران پر کوربتوب د سیمې پر کچه وروستۍ ناستې مهمه بلل شوي او همدا راز د جینوا په ناسته چې له افغانستان سره په کې څه باندې یو میلیارد ډالر بشري مرسته اعلان شوې، خو تر اوسه پوررې د دې مرستو عملي بهیر نه دی پيل شوی.
د سیاسي چارو تحلیل کوونکي په دې باور دي چې د سیمې او نړۍ هېوادونه د امریکا له خوښې پرته دغه مرستې نه ویشي.
تحلیل کوونکی عبدالصادق حمیدزوی وايي: «دا داسې هېوادونه دي چې د امریکا متحدین دي او همنظري یې دي. زما په اند د امریکا خوښې او اشارې ته به ګوري او له هغې سره سم به مزل کوي.»
ځنې بیا په دې باور دي، تر څو د مرستندویه هېوادونو غوښتنو ته درناوی نه وي شوی او ونه منل شي، له شرطونه پرته مرستندویه هېوادونه یوازې ژمنې اعلانوي، خو خپلو موخو ته تر رسېدو مخکې یې نه ویشي.
دوی وایي، اسلامي امارت باید د خپلو غوښتنو په اړه له نړۍ سره جوړ جاړی وکړي او له هغې وروسته به مرستندویه هېوادونه بې شرطه مرستې وکړي.
بل پلو د مرستو د وېش برخه کې هم اندېښنې شته دی، چې عدالت په پام کې نه نیول کېږي او د لسو په ځای سل حساب کېږي.
تحلیل کوونکي د دې مرستو مدیریت او برابر ویش لپاره وړاندیز کوي، چې اسلامي امارت دې یو کمېسیون جوړ کړي.
تحلیل کوونکی هاتف مختاروايي: «هرهغه مرسته چې د جي ۲۰ له طرفه کېږي، د افغانستان اسلامي امارت ته دې ورکول شي او که دا کار نه کوي، نو حد اقل د اسلامي امارت تر څار لاندې دې ووېشل شي، که نه دا پیسې به هم د پخوا په څېر حیف و میل شي.»
