د اسلامي امارت د بهرنیو چارو وزارت سرپرست مولوي امیر خان متقي د ایران د بهرنیو چارو د وزیر له سلاکار محمد رضا بهرامي او په کابل کې د ایران له سفیر علي رضا بیګدلي سره د دواړو هېوادونو ترمنځ اړیکو کې د نوي فصل، وروستیو پرمختګونو، د اوبو او ایران کې مېشتو افغان کډوالو د وضعیت په تړاو خبرې کړي.
د ایران د بهرنیو چارو وزیر سلاکار تهران سره د کابل اړیکې پیاوړي بللې دي او ټینګار یې کړی چې دواړه هېوادونه باید دوه اړخېزې اړیکې په ښه ډول مدیریت او پیاوړې کړي.
د بهرنیو چارو وزارت مرستیال ویاند ضیاء احمد تکل وايي: « د هېواد د بهرنيو چارو وزير ايران سره د افغانستان اړيکې مخ پر ودې وبللې او ټينګار يې وکړ چې دواړه هېوادونه له شته فرصتونو بشپړه ګټه پورته کړي. ښاغلي بهرامي پر خپل وار کابل ته د ايران د بهرنيو چارو د وزير له وروستي سفر وروسته دوه اړخيزو اړيکو کې نوی پړاو ياد او ټينګار يې وکړ چې دواړه هېوادونه وکولی شي دوه اړخيزې چارې په ښه ډول مديريت کړي.»
له ایراني چارواکو سره دا لیدنې داسې مهال دي چې ایران تل د افغانانو د ناقانونه کډوالۍ او د نشه یي توکو د قاچاق اړوند مسایلو په تړاو اندېښنه څرګنده کړې ده.
د نړیوالو اړیکو کارپوه سمیر انګار وايي: « لاهم ځینې ستونزې شته لکه د کډوالو وضعیت او د اوبو مساله چې باید بنسټیزې حل لارې ورته پيدا شي.»
د پوځي چارو کارپوه صادق خان شینواری وايي: « له دې فرصت باید هراړخیزه ګټه واخیستل شي؛ ځکه د دواړو هېوادونو اړیکې د سیمې په ثبات هم اغېز لري.»
د سیاسي او پوځي چارو کارپوهان دا ډول لیدنې د دواړو هېوادونو د ډېپلوماټیکو اړیکو پیاوړتیا لپاره مهمې ګڼي او ټینګار کوي چې اسلامي امارت بايد د ګاونډیو هېوادونو پر وړاندې له داسې سياسي تګلارې ګټه واخلي چې د تعامل په برخه کې نوي پرمختګونه رامنځته کړي.
د پوځي چارو کارپوه توریالی ځاځی وايي:« د دې لپاره باید د افغانستان حکومت او افغانان هوښیار شي، ترڅو له دې وروسته د نړیوالو او ګاونډیو هېوادونو د سیاسي موخو قرباني نه شي.»
د نړیوالو اړیکو کارپوه ابولحسن صالحي وايي:« ځینې مسایل شته چې خبرو اترو او مذاکراتو ته اړتیا لري. په ایران کې د افغان کډوالو او د افغانستان د اوبو مسایل هغه څه دي چې باید د مذاکراتو له لارې د نړیوالو حقونو او دواړو هېوادونو د نافذه قوانینو په چوکاټ کې حل شي.»
بل پلو، چارواکي نړۍ سره د افغانستان د سرپرست حکومت تعامل کې د پرمختګونو یادونه کوي او وايي، اسلامي امارت هېواد کې د ثبات ټینګښت او ملي ګټو د خوندي کولو په موخه د ایران په شمول د سیمي او نړۍ له ګڼو هېوادونو سره اړیکې ټینګې کړې او تراوسه۵۰ هېوادونو کې د افغانستان کونسلګرۍ اسلامي امارت ته سپارل شوې دي.
د اقتصاد وزارت مسلکي مرستیال عبداللطیف نظري وايي: « روان کال به جدي هڅې وشي او موږ تمه لرو چې له نړۍ سره زموږ اړیکې لا پراخې شي. له نېکه مرغه موږ دا اوس هم د سیمې له هېوادونو سره ښې اړیکې لرو او نږدې ۵۰ هېوادونه له موږ سره پراخې اړیکې لري. دا لړۍ ورځ تر بلې لا پراخېږي، خو ښکاره خبره ده چې دا لړۍ به ستونزې او ننګونې هم ولري؛ ځکه ځینې هېوادونه داسې وو چې د اشغال په برخه کې یې ونډه لرله.»
دا په داسې حال کې ده چې دوې میاشتې وړاندې د ایران د بهرنیو چارو وزیر سید عباس عراقچي، کابل ته د خپل سفر پر مهال ویلي وو چې ایران د افغانستان له حالاتو اغېزمنېږي او له همدې امله ایران باید د افغانستان د برخلیک، بدلونونو او سیاستونو په تړاو حساس وي.
