د پاکستان له ایجادېدو راهیسې دغه هېواد تل له افغانستان سره د خپل سټراټیژیک عمق له مخې اړیکې ساتلي او د یوه کمزوري ګاونډي لرلو هڅه کوي.
په تېرو نږدې څلورو کلونو کې دې هېواد هڅه کړې چې خپلې امنیتي ناکامۍ په دې توجیه کړي چې ګواکي هلته پر پوځي اهدافو بریدونه د هغو وسله والو ډلو له لوري ترسره کېږي چې په وینا یې اسلامي امارت له ډیورنډ فرضي کرښې دې غاړه افغانستان کې پټنځایونه ورکړې دي.
پاکستاني چارواکو او په نړیوالو سازمانونو کې د دې هېواد استازو هم افغانستان تورن کړی چې د پاکستان ضد وسله والو ډلو ملاتړ کوي.
په ملګرو ملتونو کې د پاکستان دایمي استازي منیر اکرم ویلي: « له بده مرغه، له داعش سره پر مبارزې سربېره، د کابل چارواکي د القاعدې شبکې، ټي.ټي.پي او د مجید برېګډ په ګډون د بلوچ وسله والو له خوا سیمې او نړۍ ته د ورپېښو ګواښونو په کنټرول کې پاتې راغلي چې دا مهال په افغانستان کې دي. تحریک طالبان پاکستان چې دا مهال ۶ زره جنګیالي لري، هغه ستره وسله واله ډله ده چې له افغانستانه فعالیت لري.»
که څه هم د افغانستان پر وړاندې د پاکستان پالیسي د تخریب سیاست دی، خو په تېرو نږدې څلورو کلونو کې دغې پالیسۍ د شدید مخالفت بڼه خپله کړې.
د سیاسي چارو شنونکي وايي، پاکستان باثباته افغانستان د ځان پر زیان بولي او له همدې کبله یې تل دلته د حکومتونو د کمزوري کولو پالیسي غوره کړې ده.
د سیاسي چارو شنونکی شهسوار سنګروال وايي: « پاکستان تل کوشش کوي چې افغانستان بدنامه او نړۍ ته یې د یوه تروریست هېواد په توګه معرفي کړي. دوی غواړي په خپل هېواد کې یې شته ستونزې پر افغانستان ور واچوي؛ اوس مهال پاکستان کې د بلوڅو آزادي غوښتونکي غورځنګ پاڅونونه دي، ټي.ټي.پي د دوی پر وړاندې یو ستر ګواښ دی. هغه ګواښوونه چې دوی ورسره مخ دي او امنیتي ځواکونه یې په کنټرول کې پاتې راغلي، له همدې امله کوشش کوي داسې وښيي چې په پاکستان کې د روانو نا امنیو لامل افغانان دي.»
د سیاسي چارو شنونکی واحد فقیري وايي:« زما عقیده دا ده چې د افغانستان او پاکستان ترمنځ ترینګلتیا به همداسې پاتې او دوامداره وي. پاکستان به تل کوشش کوي چې د خپلو ستونزو او بې کفایتیو پړه پر افغانستان واچوي. نو له همدې امله، د افغانستان حکومت باید آماده وي چې دا ستونزه اوږدمهاله ده او ترهغو چې په پاکستان کې امنیت نه وي راغلی، دا ستونزه هم موجوده وي.»
ځینې نور بیا په دې باور دي، که پاکستان له خپل تاریخي دریځ پر شا شي او پر نړیوالو اصولو ولاړ سیاست ته مخه کړي، له دې هېواد سره د افغانستان اړیکې عادي حالت ته ګرځېدلی شي.
د سیاسي چارو شنونکی عزیز معارج وايي: « اصلي خبره دا ده چې پاکستان له جوړېدو راهیسې تل هڅه کوي په افغانستان کې د خپلو ګټو پر بنیاد یو لاس پوڅی حکومت ولري. هغه حکومت چې استقلال ولري او له پاکستان سره سیالي کوي، پاکستان یې د کمزوري کولو، نا امنه کولو او ټکولو کې له مخالفانو سره لاس یو کوي، ترڅو دوی په خپله خوښه حکومت راولي.»
اسلامي امارت هم په تېرو نږدې څلورو کلونو کې د پاکستان دریځ ننګولی او د افغانستان پر وړاندې یې د پاکستان روان سیاست د دواړو هېوادونو پر زیان بللی دی.
