د سرپرست حکومت چارواکو د روسیې د هغه ګام هرکلی کړی چې غواړي د منع شویو ترهګرو ډلو له نوملړه د “طالبانو” نوم لرې کړي.
د اسلامي امارت ویاند ذبیحالله مجاهد له ټاس خبري آژانس سره مرکه کې ویلي، دا ډول ګامونه کولی شي د کابل او مسکو تر منځ ډېپلوماټیکې اړیکې لا پراخې او باوري کړي.
مجاهد زیاته کړې: « موږ په دې ټینګ باور لرو چې د مسکو او کابل تر منځ د اړیکو پراخولو لپاره اړتیا ده چې دا ډول ګامونه پورته شي. دا ډول مثبت ګامونه کولی شي د دواړو هېوادونو او خلکو ترمنځ اړېکې لا پیاورې او نږدې کړي. دا یو ډېر ارزښتناک او مهم ګام دی چې د روسیې له خوا پورته شوی دی.»
د روسیې رسنيو د راپورونو له مخې، ټاکل شوې د روسیې ستره محکمه به راتلونکې میاشت د منع شويو “ترهګرو” ډلو له نوملړه د “طالبانو” نوم ايستلو په اړه پرېکړه وکړي.
د روسيې ټاس خبري آژانس د سترې محکمې د مطبوعاتي څانګې په حواله راپور ورکړی چې ستره محکمه به د اپریل پر ۱۷مه له ياد لېسته د “طالبانو” نوم ايستلو په اړه خپل دريځ روښانه کړي.
اټکل کېږي چې د روسيې لوی څارنوال د دفتر له خوا له قانوني غوښتنې وروسته به د تړلو دروازو تر شا پر “طالبانو” دغه لګېدلی بنديز لرې کړل شي.
د روسيې سترې محکمې مطبوعاتي څانګه وايي: « د روسیې لویې څارنوالۍ د خپل هېواد سترې محکمې ته هغه ادعا د یوه لیک له مخې سپارلې چې د “طالبانو تحریک“ فعالیتونه د منع شویو ترهګرو ډلو له نوملړه وباسي او یا یې په اړه غور وکړي. د روسیې سترې محکمې هم په دې اړه هڅې پیل کړې دي. په دې لیک کې د یو شمېر نورو ډلو نومونه هم راغلي چې د روسیې ستره محکمه یې په اړه غور کوي.»
د سیاسي چارو شنونکي بیا وايي، روسیه ورو ورو هڅه کوي چې له سرپرست حکومت سره سیاسي تعامل ته را وړاندې شي.
د دوی په خبره، د مسکو ورته تازه ګامونه ښیي چې له اسلامي امارت سره په اړیکو کې پراختیا غواړي.
د سیاسي چارو شنونکی معین ګل څمکنی وايي: « د دې مانا دا ده چې روسان غواړي ورو ورو له افغانانو سره ځان نږدې کړي، ترڅو تعامل ته لاره هواره شي. له دې سره په یوه وخت به اقتصادي اړیکو ته هم پراختیا ورکړل شي، ترڅو دواړه هېوادونه له یوبل په مناسبه توګه ګټه پورته کړي، روسیه سوېلي آسیا ته لاره پیدا کړي او افغانستان منځنۍ آسیا ته؛ دلته افغانستان د یوه پل حیثیت لري.»
د روسيې ولسمشر ولادیمیر پوتین په ډسمبر کې د يوه قانون په لاسليکولو سره چې پارلمان هم تصویب کړی و، د منع شویو ډلو له نوملړه د “طالبانو” نوم د ایستلو قانوني زمینه برابره کړه.
د ياد هېواد د قانون له مخې، که چېرې يوې ډلې ترهګريز فعاليتونه پرې اېښې وي، محکمه کولی شي د لوی څارنوال د غوښتنې پر بنسټ ترې د بنديز د لرې کولو پرېکړه وکړي او امنيتي ادارې یې د ممنوعه ډلو له نوملړه وباسي.
له دې ټولو سره، د روسيې حکومت وړاندې ويلي، د ترهګرو ډلو له لېسته د “طالبانو” نوم ايستل به د دوی د حکومت د رسميت پېژندلو په مانا نه وي.
