د اسلامي امارت مشرتابه په کندهار کې د دفاع، کورنیو چارو وزارتونو له سرپرستانو او د استخباراتو له عمومي رییس کتلي دي.
د اسلامي امارت مرستيال وياند وايي، د مولوي محمد یعقوب مجاهد، خلیفه سراج الدین حقاني او عبدالحق وثیق په ګډون د دفاع او کورنیو چارو وزارتونو مرستیالانو هم کندهار کې د اسلامي امارت رهبر ته د هېواد د امنیت په اړه راپور وړاندې کړی.
حمدالله فطرت ویلي، دغه ناسته کې د امنیتي ادارو د وړاندیزونه اورېدو سربېره، د چارو د ښه تنظیم او ظرفیت لوړونې په موخه مهمې پرېکړې هم شوې دي.
فطرت زیاته کړې:« د ملي دفاع وزیر محترم مولوي محمد یعقوب مجاهد، د کورنیو چارو وزیر محترم خلیفه سراج الدین حقاني، د استخباراتو لوی رییس محترم ملا عبدالحق وثیق، د دفاع وزارت مرستیال محترم ملا عبدالقیوم ذاکر او د کورنیو چارو وزارت مرستیال محترم مولوي محمد نبي عمري په کندهار کې امیرالمؤمنین ته د هېواد د امنیت په اړه راپور وړاندې کړ. په ناسته کې د یادو امنیتي ارګانونو وړاندیزونه واوریدل شول او هغوی ته د اجرأاتو او د کاري استقامتونو په برخو کې لازم هدایات وشول او د لاښه نظم، تجهیز او ظرفیت لوړونې په اړه لازم تصامیم ونیول شول.»
د پوځي او سیاسي چارو کارپوهان د امنیتي سکټور مسوولینو او د اسلامي امارت مشرتابه ترمنځ ګډې ناستې د امنیت په برخه کې د لا ډېرې همغږۍ او دایمي ثبات رامنځته کولو لپاره مهمې ګڼي.
د سیاسي چارو کارپوه شهزاده مسعود وايي: « زما په اند دا ډول ناستې په یوه نظام کې معمول کار دی. زه هیله لرم دغه ډول ناستي د دایمي سولې او ثبات لپاره ګټورې تمامې شي او په ورته وخت کې دا چې افغانستان د جرګو او مرکو وطن دی، په هر ډول ملي مسایلو کې د افغانستان خلک وپوښتل شي او د ملي جرګو له لارې خپلې داخلي ستونزې حل کړي او دغه راز له نړۍ سره هم د یوه مثبت تعامل لاره خپله کړي.»
پوښتنه داده چې د درېیو امنیتي ارګانونو د لوړ پوړو چارواکو او اسلامي امارت د رهبر ترمنځ دا ډول ناستې د افغانستان روان امنیتي وضعیت لپاره څه پایلې لري؟
د سیاسي چارو شنونکی توریالی ځاځی وايي: « نړیوال اوس په دې پوه شول چې افغانستان کې امنیت تأمین شوی، سوله راغلې. نو د دې لپاره باید نړیوال هېوادونه یا خپله اسلامي امارت د افغانستان د امنیت لپاره مثبتې هڅې وکړي، دا د نړیوالو غوښتنه هم ده. زه تمه لرم چې افغانستان نور له ستونزو وژغورل شي.»
د اسلامي امارت رهبر تر دې شاوخوا درې مياشتې وړاندې د قول اردوګانو له مسوولینو، د دفاع وزارت او د استخباراتو له مرستیالانو سره په لېدنه کې له پوځي لیکو د نامطلوبه کسانو پر ایستلو هم ټینګار کړی و.
